༸སྐྱབས་རྗེ་མཁན་སློབ་རྣམ་གཉིས་ཀྱི་གསོལ་འདེབས།

བོད་མིའི་སྒྲིག་འཛུགས་ཀྱི་རྩིས་ལོ་ ༢༠༡༦༌༌༡༧ ལོའི་ཚོད་དཔག་ཚོགས་ཆུང་གི་སྙན་ཐོ།

བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༡༦་་༌༢༠༡༧ ལོའི་

བོད་མི་མང་སྤྱི་འཐུས་ལྷན་ཚོགས་ཀྱི་སྔོན་རྩིས་ཚོད་དཔག་

འཆར་རྩིས་ཚོགས་ཆུང་གི་སྙན་ཐོ།

དང་པོ། ཚོགས་མི་བསྐོ་གཞག

༄༅། །བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོས་ཕྱི་ལོ་ ༢༠༡༦ ཟླ་ ༡ ཚེས་ ༧ འཁོད་བཀོད་ཁྱབ་ཕེབས་དགོངས་སུ་རྩིས་ལོ་ ༢༠༡༦༌་་༢༠༡༧ ལོའི་བོད་མིའི་སྒྲིག་འཛུགས་ཀྱི་ལོ་འཁོར་སྔོན་རྩིས་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོད་དཔག་འཆར་རྩིས་ཚོགས་ཆུང་གི་མི་འགྲོར།

༡༽     སྤྱི་འཐུས་ཀརྨ་ཡེ་ཤེས།

༢༽     སྤྱི་འཐུས་དགེ་བཤེས་སྨོན་ལམ་མཐར་ཕྱིན།

༣༽     སྤྱི་འཐུས་ཨཱཅརྱ་ཡེ་ཤེས་ཕུན་ཚོགས།

༤༽    སྤྱི་འཐུས་འཇམ་དབྱངས་བཟོད་པ།

༥༽     སྤྱི་འཐུས་བསོད་ནམས་རྒྱལ་མཚན་བཅས་བསྐོ་གཞག་གནང་སྟེ་ཚོགས་ཆུང་གི་ལས་དོན་ཕྱི་ལོ་ ༢༠༡༦ ཟླ་ ༢ ཚེས་ ༢༩ ནས་འགོ་འཛུགས་དགོས་པ་དང་། གྲུབ་དོན་སྙན་ཐོ་ཟླ་ ༣ ཚེས་ ༡༩ ཉིན་གྲོས་ཚོགས་ཚོགས་དུས་བཅུ་གཅིག་པའི་གོང་དུ་ཚོགས་དྲུང་ལས་ཁུངས་སུ་འབུལ་དགོས་སྐོར་གསལ་བ་དང་། དེ་རྗེས་ ༢༠༡༦ ཟླ་ ༢ ཚེས་ ༢༩ འཁོད་བཀོད་ཁྱབ་ནང་སྤྱི་འཐུས་འཇམ་དབྱངས་བཟོད་པ་དགོངས་ཞུ་གནང་སྟབས་ཚོགས་ཆུང་གི་ཚོགས་མིར་སྤྱི་འཐུས་དགེ་བཤེས་ཨ་ཀྲུག་ཚེ་བརྟན་བསྐོ་གཞག་གནང་།

གསུམ་བཅུའི་དུས་དྲན་ཐེངས་ ༥༧ པའི་སྤྱི་འཐུས་ཀྱི་གསུང་བཤད།

བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༥༧ པའི་ཐོག་

བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད།

༄༅། །དེ་རིང་གི་ཉིན་མོ་འདི་ནི་ཕྱི་ལོ་ ༡༩༥༩ ལོར་བོད་ཆོལ་ཁ་གསུམ་གྱི་རྒྱ་ཆེའི་མང་ཚོགས་རྣམས་ཀྱིས་བོད་ཀྱི་རྒྱལ་ས་ལྷ་སར་རྒྱ་དམར་གྱི་ངན་སྤྱོད་ལ་རྒོལ་བའི་མི་མང་སྒེར་ལངས་ཆེན་མོའི་དུས་ཚིགས་ཤིག་དང་། དེ་བཞིན་བོད་ཀྱི་རྒྱལ་གཅེས་དཔའ་བོ་དཔའ་མོའི་རྗེས་དྲན་གྱི་ཉིན་མོ་ཞིག་ཀྱང་ཡིན་སྟབས། ངས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་བོད་བསྟན་སྲིད་མི་རིགས་ཀྱི་ཆེད་དུ་ལུས་སྲོག་ལོངས་སྤྱོད་དང་བཅས་པ་ཡོངས་སུ་བློས་བཏང་གནང་བའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་མཛད་རྗེས་ལ་དྲན་གསོ་དང་། ད་དུང་ཡང་རྒྱ་གཞུང་གི་མནར་གཅོད་གདུག་རྩུབ་འོག་དཀའ་སྡུག་མྱོང་བཞིན་པའི་གཞིས་བཞུགས་བོད་མི་ཡོངས་ལ་སྐྱིད་སྡུག་མཉམ་མྱོང་དང་གདུང་སེམས་མཉམ་སྐྱེད་ཞུ་རྒྱུ་ཡིན།

༸སྐྱབས་རྗེ་སྨན་རིའི་ཡོངས་འཛིན་སྨྲ་བའི་དབང་པོ་མཆོག་གི་འབུར་ཐོན་གྱི་མཛད་པ།

 

༄༅། །དེ་རིང་གི་དུས་བཟང་འདིར་༸སྐྱབས་རྗེ་ཡོངས་འཛིན་སློབ་དཔོན་སྨྲ་བའི་སེང་གེའི་འབུར་ཐོན་གྱི་

མཛད་པ་ཆེ་ཤོས་ཁག་ཅིག གཤམ་དུ་ངོ་སྤྲོད་ཞུ་བར་འདོད་པས་བོན་སྐྱོང་སྲུང་མ་

རྣམས་ཀྱིས་གཟུ་དཔུང་མཛད་དུ་གསོལ་ལོ། །

བླ་མ་ཡི་དམ་མཁའ་འགྲོ་གསུམ་གྱི་ཞབས་ལ་གུ་དུན་ཧྲུན། །

༧ རྫོགས་པའི་སངས་རྒྱས་དངོས་བཞུགས་ཀྱང་། །ཁྱེད་ལས་ལྷག་པའི་བྱ་བ་ཞིག །འདི་ཞེས་ཡོད་རེ་དཀོན་ནོ་ཞེས། །ཁྱེད་ཀྱི་མཛད་པའི་ཆེ་བ་དྲན།། ༧ རྣམ་འདྲེན་དམུ་སྲས་མགོན་པོ་ཡི། །སྐུ་གསུང་ཐུགས་ཀྱི་འཕྲིན་ལས་གང་། །ཇི་ལྟར་ཡིན་པའི་རྣམ་འགྱུར་དག། །ཁྱེད་ཀྱི་མཛད་པའི་གྲངས་ནས་མཇལ།། ༧ དེ་རིང་བཟང་དགུ་འཛོམ་བཅུའི་ཉིན། །གཤེན་རབ་འཁྲུངས་སྐར་ལེགས་སྐྱེས་སུ། །རྗེས་འཇུག་སེམས་དཔའ་ཆེན་པོ་ཡིས། །གཤེན་བསྟན་འཛིན་སྐྱོང་སྤེལ་ཚུལ་གླེང་། །

འབེལ་གཏམ་ལུང་གི་སྙིང་པོ། དུམ་བུ་བཅོ་ལྔ་པ། རྫོགས་སོ།།

༸སྐྱབས་རྗེ་སྨན་རིའི་ཡོངས་འཛིན་སྨྲ་བའི་དབང་པོ་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག

གཡུང་དྲུང་བོན་གྱི་བསྟན་པའི་སྒོར་འཇུག་ཚུལ།

          གཡུང་དྲུང་བོན་གྱི་བསྟན་པའི་སྒོར་འཇུག་པའི་གང་ཟག་གིས། བྱང་ཆུབ་བསྒྲུབ་པའི་ཚུལ་ལ། རྨད་བྱུང་བསླབ་པ་རྣམ་པ་གསུམ་གྱིས་རྒྱུད་བསྡམས་ནས། དཔྱོད་ལྡན་རིགས་ལམ་ལ་བརྟེན་ནས་མདོ་སྔགས་ཀྱི་གནད་བཙལ། དེ་རང་གི་རྒྱུད་ཐོག་ཏུ་བཀལ་ཏེ་བྱང་ཆུབ་བསྒྲུབ་པའི་ཚུལ་ནི། བཅུད་ལྡན་ཏེ་མཁས་བཙུན་བཟང་གསུམ་གྱི་ཡོན་ཏན་མཐའ་ཡས་པས་གང་བའི་དགེ་བའི་བཤེས་གཉེན་དང༌། ཁྱད་པར་དུ་གཞུང་གང་བཤད་པ་སྐབས་སུ་བབ་པ་དེའི་གནད་དོན་ལ་དོགས་པ་ཆོད་པ་ཞིག་བཙལ། དེ་ལ་བསྟེན་ཏེ། དོན་ལྔ་དང་ཚུལ་གསུམ་གྱི་སྒོ་ནས་རྗེས་སུ་དཔག་པའི་བློ་བཙལ། བློ་དེ་ཡང་མདོ་སྔགས་སེམས་གསུམ་གྱི་གདམས་པ་ལ་འཇུག་ཅིང་མཐའ་ཆོད་པའི་རྙེད་དོན་རང་རྒྱུད་ལ་སྦྱར་ཏེ་བྱང་ཆུབ་བསྒྲུབ་པའི་ཚུལ་གཅིག་ཡོད་ལ། གཞུང་ཡང་སྔ་རབས་ཀྱི་དུས་སུ་སྔགས་སེམས་གཙོ་བོར་སྟོན་པའི་རྒྱུད་གཞུང་བྱང་སེམས་གབ་པ་རྩ་འགྲེལ་དང༌། ཕར་ཕྱིན་གྱི་གནས་རྣམས་སྟོན་པ། ས་ལམ་གྱི་ཡིག་ཆ་རྣམས་དང༌། གནས་ཆེན་བཅུ་བདུན་སྟོན་པའི་གཞུང༌། མཛོད་རྩ་འགྲེལ་བཅས་ཀྱི་སྒོ་ནས་གཞུང་ལུགས་རབ་འབྱམས་ལ་སློབ་པ་དང༌། ཕྱིས་སུ་མཉམ་མེད་པའི་ཕྱིན་ཆད་མདོ་དོན་གཙོ་བོར་སྟོན་པའི་ཚད་མ་གཞུང་འགྲེལ་དང་སྔགས་དོན་གཙོ་བོར་སྟོན་པའི་ཚད་མའི་ཡིག་ཆ། ཕར་ཕྱིན་ཁམས་ཆེན་པོ་བརྒྱད་དང་མཚོན་བྱེད་བཞི་བཅུ་ཞེ་ལྔ་བཅས་པ་སྟོན་པའི་གཞུང་སྐབས་བརྒྱད་ཆ་ལག་ཆ་རྐྱེན་དང་བཅས་པ་དང༌། དངོས་བསྟན་སྟོང་ཉིད་གཙོ་བོར་སྟོན་པ་ཟབ་མོ་དབུ་མའི་གཞུང་ཆ་ལག་ཆ་རྐྱེན་དང་བཅས་པ་དང༌། རྣམ་དག་འདུལ་བའི་གཞུང་འགྲེལ་བ་རྒྱས་འབྲིང་བསྡུས་པ་རྣམས་དང༌། གནས་ཆེན་བཅུ་བདུན་སྟོན་པའི་མཛོད་གཞུང་དང་ཆ་ལག་འགྲེལ་བ་མཐའ་དཔྱོད། གསང་དོན་རྣམ་འབྱེད་འཕྲུལ་གྱི་སྒྲོན་མ་གཞུང་འགྲེལ་དང་བཅས་པ་ལ་བརྟེན་ཏེ་རིམ་གཉིས་ཀྱི་སྒོ་ནས་སྔགས་ཀྱི་ས་ལམ་བསྒྲོད་པའི་ཚུལ་སོགས་སྦྱང་ཞིང་བསླབ་པའི་སྲོལ་གཅིག་དང༌། དད་པ་ཅན་སྐྱ་སེར་གང་རུང་མང་པོ་རང་གང་ལ་མོས་པའི་བླ་མ་དགེ་བའི་གཤེས་གཉེན་ཞིག་བཙལ་ཏེ། དེ་ལས་འཁོར་བ་ནི་འཇིགས་ཤིང་སྡུག་བསྔལ་མི་བཟོད་པའི་གནས་ཡིན་པའི་ཚུལ་དང༌། དེ་ལས་སྐྱོབས་པའི་ནུས་པ་མཐར་ཐུག་པ་ནི་རྫོགས་པའི་སངས་རྒྱས་ཁོ་ན་ལ་མངའ་བ་ཡིན། དེ་ཡང་གང་ཟག་རང་རང་གི་རྒྱུད་ཀྱི་འཁོར་བའི་འཇིགས་པ་ནི་རང་གི་ཐོབ་བྱ་གྱུར་པའི་སངས་རྒྱས་དེ་ཡིས་བཅོམ་པ་ལས་རྒྱུད་ཐ་དད་པའི་སངས་རྒྱས་ཀྱིས་རྒྱུད་ཐ་དད་པའི་སེམས་ཅན་གྱི་འཁོར་བའམ་ལས་ཉོན་དངོས་སུ་སྤོང་བ་མི་སྲིད་པའི་ཕྱིར་ཏེ། དེ་ལ་གནོད་པ་མི་བྱེད་པའི་ཕྱིར། དེས་ན་རང་གི་ཐོབ་བྱར་གྱུར་པའི་སངས་རྒྱས་དེ་བསྒྲུབ་པ་ནི་ནང་པ་གཤེན་རབ་པའི་གྲུབ་མཐའི་སྒོར་ཞུགས་ཏེ་བསྒྲུབ་པ་མ་གཏོགས་དེ་ལས་གཞན་པའི་གྲུབ་མཐའ་གང་ནས་ཀྱང་རྫོགས་པའི་སངས་རྒྱས་འགྲུབ་མི་སྲིད་པའི་ཕྱིར་ཏེ། དེ་བསྒྲུབ་པའི་ཐབས་ཁྱོད་ལ་མེད་པའི་ཕྱིར།

འབེལ་གཏམ་ལུང་གི་སྙིང་པོ། དུམ་བུ་བཅུ་བཞི་པ།

༸སྐྱབས་རྗེ་སྨན་རིའི་ཡོངས་འཛིན་སྨྲ་བའི་དབང་པོ་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག

གླུ་བྲོའི་སྐོར།

          བོད་ཡུལ་འབྲོག་སྡེ་ཕལ་ཆེར་གྱི་རྗེ་བོས་གཙོས་གླུ་ངག་འདྲ་མིན་དང་ཚིག་དོན་བསྟོད་སྨད་བར་མའི་རྣམ་པ་ཅན་གྱིས་དགའ་བའི་རྣམ་འགྱུར་ངོམས་ཤིང་གཞས་དང་ཞབས་བྲོ་བྱེད་པ་ཉུང་ངོ༌། །དབུས་གཙང་གི་ཡུལ་པ་རྣམས་ཀྱིས་ཕལ་ཆེར་རྣམ་ཐར་དང༌། ལས་ཀྱི་བྱ་བ་མི་འདྲ་བ་རྨོ་རྐོ་བརྩེགས་པ་སོགས་ཀྱི་སྐབས་སུ་ལས་མི་རྣམས་ཀྱི་ལས་དང་བསྟུན་པའི་གཞས་ཚིག་མི་འདྲ་བ་དུ་མ་དབྱངས་བཞིན་འུར་གྱིས་འགེངས་པ་དང་གཞན་ཡང་ཆང་འཐུང་བའི་སྐབས་སུ་ཁྲུང་གཞས། ཞབས་བྲོ་སོགས་ལ་གང་མིན་གྱི་དག་སྣང་བྱེད་ཅིང༌། ཁྱད་པར་དུ་གཙང་ཐོབ་རྒྱལ་དུ། འཁྲུངས་གཞིས་ཚེས་བཅུ་ཆེན་མོའི་སྐབས་སུ་ཕོ་མོ་དྲུག་ཅུའི་སྐོར་གྱིས་ཆས་ལུགས་སྔར་ལུགས་ཀྱི་གྱོན་ཆས་ཀྱིས་སྤྲས་ཏེ་ངག་དང་ལག་སྟབས་སོགས་སྒེགས་ཉམས་ཅན་སྔར་སྲོལ་མ་ཉམས་པ་ཡོད་རེད། ཡུལ་གྱི་གྲོང་གསེབ་རྣམས་ལ་སྒྲ་སྙན་རྒྱུད་སྐུད་ཉུང་ཤས་ཡོད་པ་ཞིག་ལ་བརྩེ་བ་རེད། ཁམས་ཡུལ་དུ་མི་ཕལ་ཆེར་གླུ་དང་ཞབས་བྲོ་བྱེད་ཀྱང༌། གཙོ་བོར་སྒྲུང་གཏམ་ལ་དག་སྣང་ཆེན་པོ་ཡོད་རེད། སྐབས་འགར་སྒྲུང་མཁན་ཟེར་བའི་མི་ཆས་ལུགས་མི་འདྲ་བ་དང༌། ངག་དང་སྒྲུང་ཚིག་དུ་མ་ཤེས་མཁན་དེ་འདྲ་འབོད་ནས་སྒྲུང་བཤད་པ་ཡོད་རེད། བུད་མེད་ཀྱིས་སྒྲུང་བཤད་པ་ཡང་ཡོད་རེད། ཁམས་ཡུལ་དུ་རོལ་ཆས་པི་ཝཾ་ལ་བརྩེ་བ་མང་ངོ༌། །

འབེལ་གཏམ་ལུང་གི་སྙིང་པོ། དུམ་བུ་བཅུ་གསུམ་པ།

༸སྐྱབས་རྗེ་སྨན་རིའི་ཡོངས་འཛིན་སྨྲ་བའི་དབང་པོ་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག

གསར་བོན་གྱི་སྐོར།

          གསར་བོན་ལའང་ལུགས་དུ་མ་ཡོད་དེ། སངས་རྒྱས་གླིང་པ་བྱང་ཆུབ་རྡོ་རྗེའི་ལུགས། མི་ཤིགས་རྡོ་རྗེ། གཏེར་སྟོན་བདེ་ཆེན་གླིང་པའི་ལུགས། ཀུན་གྲོལ་འཇའ་ཚོན་སྙིང་པོའི་ལུགས་སོགས་ཡོད་དོ། །ཕྱིས་སུ་ཉག་གཏེར་གསང་སྔགས་གླིང་པར། ཡིག་ཆ་སྔགས་ཆོག་སོགས་བོན་རྙིང་དང་འདྲ་མིན་ཅི་རིགས་ཡོད། འདིའི་སྔགས་ཆོག་རྣམས་ཀྱི་བརྒྱུད་པའི་གཙོ་བོ་སྐུ་གསུམ་སངས་རྒྱས། དྲན་པ་ཡབ་སྲས་གསུམ་ཡིན་ཞིང༌། དེ་ཡང་ཡབ་དྲན་པ་ནམ་མཁའ། ཡུམ་འོད་ལྡན་འབར་མ། སྲས་ཚེ་དབང་རིག་འཛིན་དང་པདྨ་མཐོང་གྲོལ་ལམ་པདྨ་འབྱུང་གནས་ཡིན། ཕྱག་ལེན་གྱི་སྲོལ་རྙིང་མ་དང་མཚུངས་པ་མང་ངོ༌། །

འབེལ་གཏམ་ལུང་གི་སྙིང་པོ། དུམ་བུ་བཅུ་གཉིས་པ།

༸སྐྱབས་རྗེ་སྨན་རིའི་ཡོངས་འཛིན་སྨྲ་བའི་དབང་པོ་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག

ཁྲི་སྲོང་གི་སྲས་བརྒྱུད་ཀྱི་སྐོར།

          བསྒྲགས་བྱང་ལས། ཡུམ་སྲས་ཞལ་མ་འཆམས་པར། ཟས་ངན་གཏོང་རེས་བྱུང༌། རྗེའི་གདུང་རྒྱུད་ལད། མི་ཁས་ཕོག་ཅེས་སོ། །ཁྲི་སྲོང་གི་སྲས། མུ་བེར་བཙན་པོ་དང་༼སད་ན་ལེགས་མཇིང་ཡོན་ཡང་ཟེར་༽ མུ་དུག་བཙན་པོ་དང༌། མུ་ནེ་བཙན་པོ་དང་གསུམ་མོ། །ཞེས་དང༌། ཡོངས་རྩེའི་འགྲེལ་བ་ལས། རྒྱལ་པོ་ཁབ་ཆེན་ཆུན་གཉིས་ཡོད་པས། ཆེན་མ་བྲམ་ཟེ་ལ་སྲས་མེད་ཀྱང་ཆོས་ལ་མོས་པས་མངའ་ཐང་ཆེ། ཆུང་མ་ཚེ་སྤུངས་ཟ་སྲས་གསུམ་གྱི་མ་ཡིན་ཀྱང༌། བོན་ལ་མོས་པས། རྒྱལ་པོས་ཐབས་ཀྱིས་སྤངས་པས་མངའ་ཐང་ཆུང༌། དེ་ལ་ཚེ་སྤུངས་ཟ་སྙིང་ན་ནས། གསང་ཐུབ་པའི་བློན་པོ་གཉིས་མངགས་ཏེ། བྱང་ཕྱོགས་རྟ་ཡི་ཉིན་ལམ་བདུན་གྱིས་སླེབས་པ་ན། སུམ་པའི་བོན་པོ་སྟག་སེ་ར་རྒྱ་ཚབ་བྱ་བ་མཐུ་རྩལ་རྨད་དུ་བྱུང་བ། རྐང་མགྱོགས་རླུང་དང་མཉམ་པ་ཞིག་གདན་དྲངས་ནས། དཔོན་སློབ་གསུམ་བྱོན་ཏེ། ཇོ་མོས་རྒྱལ་པོ་ལ་མཐུ་མཛད་པར་ཞུ། ཞུས་པས། རྫས་ལ་རྒྱལ་པོའི་ན་བཟའ་དྲི་མ་ཅན་ལས་སོགས་བསྙགས་པས། ཚེ་སྤུངས་ཟས་སྲས་མུ་རི་སྒམ་པོ་མངགས་ནས། རྒྱལ་པོའི་སྐུ་རིམ་བྱེད་པའི་ཡས་གོས་སུ་རྒྱལ་པོའི་ན་བཟའ་དྲི་མ་ཅན་ཞུས་ལ་ཤོག་བྱས་ནས་བཏང་བས། རྒྱལ་པོ་དམག་སྐུད་གཉིས་ཕོ་བྲང་སྟེང་དུ་ཆོ་ལོ་བརྩེ་ཞིང་ཡོད་ནས། ཞང་བུ་རིང་ལ་སྒོ་བསྲུང་དུ་བཅུག་གོ །སྒོ་ཕྱེ་དང་སྒམ་པོ་ཡིན་བྱས་ཀྱང་མ་ཕྱེས་པས། སྒོ་གྱད་ཀྱིས་བཅག་ནས། ཕ་ཁྱིམ་དུ་བུ་འོང་བ་ལ་སྒོ་གཅོད་མཁན་སུ་ཡིན་བྱས་ནས། སྐུ་ཞང་གི་མགོ་ལ་རལ་གྲི་བརྒྱབ་སྟེ་བསད། རལ་གྲི་ཁྲག་ཅན་ཕྱི་ཞིང་ཡབ་གྱི་མདུན་དུ་ཕྱིན་པས། རྒྱལ་པོས་སྒམ་པོ་ཁྱོད་ཅི་ལ་འོང༌། སྒོ་སུས་ཕྱེས་ཞང་བུ་རིང་གར་སོང་བྱས་པས། སྒོ་གོར་མོ་རྡོས་ཕྱེས། ཞང་བུ་རིང་ངན་པ་ཤུལ་རིང་ཞིག་ཏུ་སོང༌། ང་བཙུན་མོས་རྒྱལ་པོའི་སྐུ་རིམ་བྱེད་ཟེར་ནས་ཡས་གོས་ལ་ན་བཟའ་དྲི་མ་ཅན་ཞུ་རུ་འོང་ཟེར། རྒྱལ་པོ་བྲེད་ནས་ཟ་འོག་གི་སྟོད་ཐུང་དྲི་མ་ཅན་བསྐུར་ནས་བཏང༌། སྒམ་པོས་ཡུམ་ལ་གཏད་ནས། ཁོ་རང་ཟ་ཁྲལ་བསྡུ་རུ་བྱོན། དེ་ནས་སུམ་པའི་བོན་པོས་ནབ་བཟའ་ལ་ལིང་ག་བྲིས་ནས་སུམ་པའི་དྲག་སྔགས་ཀྱིས་བྲུབ་པས། ཞག་བདུན་གཉིས་ནང་དུ་རྒྱལ་པོ་ཐུབ་བོ། །སུམ་པའི་བོན་པོ་ཡང་མྱུར་བར་རང་ཡུལ་དུ་གཤེགས་སོ། །ཞེས་པ་རྣམས་བཀའ་འབུམ་ནས་བཤད་པ་བཏུས་སོ། །

འབེལ་གཏམ་ལུང་གི་སྙིང་པོ། དུམ་བུ་བཅུ་གཅིག་པ།

༸སྐྱབས་རྗེ་སྨན་རིའི་ཡོངས་འཛིན་སྨྲ་བའི་དབང་པོ་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག

ཁྲི་སྲོང་ལྡེ་བཙན་གྱི་སྐོར།

          ཁྲི་རྗེ་གཙུག་བརྟན་དང་རྒྱ་མོ་ཀོང་ཇོ་གཉིས་ལ་སྲས་ཁྲི་སྲོང་ལྡེ་བཙན་བྱུང༌། རྒྱལ་པོ་འདི་དང་དུས་མཉམ་དུ་ཡོངས་རྩེ་ཀློང་ཆེན་ལས་གསུངས་པ། བླ་ཆེན་དྲན་པ་ནམ་མཁའ་དང༌། སྙ་ལི་ཤུ་སྟག་རིང་བཞུགས་པའི་དུས། ཞེས་དང༌། ཞང་ཞུང་སྙན་རྒྱུད་ལས། ཞང་ཞུང་ལ་གྲུབ་པ་ཐོབ་པ་མང་ཡང༌། སྤ་ཇི་ཁྲོམ་དཀར་པོ་བཞུགས་པའི་དུས་སུ། ཞང་ཞུང་ན་རྒྱལ་པོ་ལིག་མི་རྐྱ་བཞུགས། ཞང་ཞུང་གི་རྒྱལ་པོ་སྐུ་འཚོ་བའི་གཤེན་པོ་གུ་རིབ་སྣང་བཞེར་ལོད་པོ་བཞུགས། བོད་ཀྱི་སྐུ་གཤེན་མཁས་ཤིང་རིག་པ་དང་ལྡན་པ་དྲན་པ་ནམ་མཁའ་བཞུགས། ཞེས་གསུངས། ཞང་ཞུང་གི་དྲན་པ་ནམ་མཁའ་ཞང་ཞུང་ལ་སྔར་བཞུགས་ཟིན། འདི་བོད་ཡུལ་དྭགས་པོའི་ཡུལ་དུ་འཁྲུངས་པའི་དྲན་པ་ནམ་མཁའ་ཡིན་ནོ། །

འབེལ་གཏམ་ལུང་གི་སྙིང་པོ། དུམ་བུ་བཅུ་པ།

༸སྐྱབས་རྗེ་སྨན་རིའི་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག

ཁྲི་ཐོག་རྗེ་བཙན་གྱི་དུས་སུ་བསྟན་པ་དར་བ།

          བསྒྲགས་པ་རིན་ཆེན་གླིང་གྲགས་ལས། རྒྱ་ཝེར་ལི་ལོད་བཙན་གྱི་དཔོན་གསས་ནི་སྟོང་སྒྲ་ཀུན་འདུལ། ལྷ་བོན་ཅོའུ་འོད་དཀར། ༼རྒྱལ་པོ་འདིའི་མཚན་བྲིས་ནོར་ཡིན་པ་འདྲ༽ ཁྲི་ཐོག་རྗེ་ཐོག་བཙན་གྱི་རིང་ལ། དཔོན་གསས་ལྗང་ཚ་འཕན་སྣང༌། ལྷ་བོན་ཐ་ཚ་ཁོག་འཕར་དེའི་དུས་ན་རྒྱལ་ཁྲི་རྗེ་ཐོག་བཙན་གྱི་ཞལ་ནས། གཤེན་རབས་བླ་མ་རྣམས་ཀྱང་དགོངས་ཤིག །སྐུ་གཤེན་རྣམས་ཀྱང་དགོངས་ཤིག །བོད་འབངས་ཀུན་ཀྱང་སོམས་ཤིག །བླ་ཡི་རྒྱལ་སྲིད་བོན་གྱིས་འཚོ་བའི་དུས་འདིར་བོན་གཉན་པས་བླ་ན་ཆེ། རྗེ་གོང་ན་བཙུན། འབངས་འོག་ན་སྐྱིད་པས་སྟོན་པ་ཀུན་འདུས་ཤིག་བཀའ་བྱུང་ངོ༌། །རྒྱལ་པོའི་བཀའ་བྱུང་བས་བོན་གཤེན་རྒྱལ་བློན་རྣམས་འདུས་སོ། །རྗེས་བློན་བོན་གཤེན་ལ་བསྩལ་པ། ཀྱཻ་སྐྱེས་བུ་ཆེན་པོ་ལྔ་བརྒྱ་དྲན། རིག་འཛིན་ས་ལ་གནས་པས་ཚེའི་དངོས་འགྲུབ་ཐོབ། སྐུ་ལ་འདས་གྲོང་མི་མངའ་ཁྲི་ཐུབ་བསྟན་པ་མཛད། མངོན་ཤེས་རྩལ་རྫོགས་འདི་ཕྱི་ཀུན་ཀ་མཁྱེན། སྟག་གཟིག་ཞང་ཞུང་ཡུལ་ན་གསང་བའི་བོན། རྫུ་འཕྲུལ་སྟོབས་ཀྱིས་གང་ཡོད་མཁྱེན། ཚེགས་ཆུང་དོན་ཆེན་བསླབ་པ་སླ། བསྒྲུབ་ཐག་ཉེ་བའི་བོན་ཞིག་བཙལ་བར་ཞུ། བོད་འབངས་ཀུན་གྱིས་གསེར་ཁྲོལ་བུ་སྐུར་ཅིག་གསུངས། དུས་དེར་བོད་འབངས་ཀུན་གྱིས་གསེར་བསྡུས་ནས། བླ་ཆེན་པོ་ལ་བརྫངས་སོ། །བླ་ཆེན་པོས་རྫུ་འཕྲུལ་སྟོབས་ཀྱིས་སྟག་གཟིག་ཡུལ་དུ་བྱོན་ཨ་རུ་ར་དང༌། ཛ་ཏི་སྨན་གྱི་ཚལ་གྱི་ཕ་ལོག་ན། གཡུང་དྲུང་འོད་མའི་གླིང་གི་ཤར་ཕྱོགས་ན། དཔོན་གསས་གཡུང་དྲུང་རྒོད་འབར་ལས། དུག་ལྔ་རང་གྲོལ་གསང་སྔགས་ཀྱི་བོན། གསང་བ་ཆིག་ཆོད་རྫོགས་ཆེན་གྱི་བོན། མཉམ་པ་གཉིས་མེད་སེམས་ཕྱོགས་ཀྱི་བོན། ཐར་པ་ཆིག་གྲོལ་ཚེ་འདས་ཀྱི་བོན། དེ་ལྟར་བོན་སྒོ་གདན་དྲངས་ནས། གེ་ཁོད་ཐིས་ཀྱི་སྐོར་ཡང་གདན་དྲངས། བསྟན་པ་རྒྱས་པ་ལགས་སོ། །ཞེས་དང༌། དར་རྒྱས་གསལ་སྒྲོན་ལས། ཁྲི་ཐོག་རྗེ་བཙན་དང༌། རུ་ཡང་ཟ་སྟེང་རྒྱལ་ནམ་མཚོའི་སྲས། ཐོ་ཐོ་རི་སྙན་བཙན། དེའི་རིང་ལ་བསྟན་པ་ ༼མཆན། ཕྲན་བུ༽ གནམ་བབས་སུ་བྱུང་ཞེས་བྱམས་མ་ནས་གསུངས་པ་ལ། ཟ་མ་ཏོག་བཀོད་པ་དང༌། པང་ཀོང་ཕྱག་རྒྱ་པ་དང༌། གསེར་གྱི་མཆོད་རྟེན་ཞིག་བྱུང་སྟེ། ཆོས་སུ་ངོ་མ་ཤེས་པར་གཉན་པོ་གསང་བར་བཏགས་སོ། །རྒྱལ་པོ་དེའི་སྐུ་བསྲུང་ཡང་གཅོ་ཡི་བོན་པོ་གཡང་སྐྱེས། མཚོའི་བོན་པོ་འདུལ་སྲོང་དང༌། འབྲིའི་བོན་པོ་ཤོད་དྲི་གསུམ་གྱིས་སྐུ་བསྲུངས་ཤིང༌། ཚེ་བསྒྲུབས་མཛད་པས། ལྷ་ཐོ་ཐོ་ཡང་མུར་འགྲམ་སེ་བོར་སོང་བ་དེ། གཞོན་ནུ་ཁྱེའུ་ཞིག་ཏུ་སོང་བས་དད་པ་སྐྱེས་ཏེ་གསེར་གྱི་བུམ་པ་ཕུལ་ལོ། །

འབེལ་གཏམ་ལུང་གི་སྙིང་པོ། དུམ་བུ་དགུ་པ།

༸སྐྱབས་རྗེ་སྨན་རིའི་ཡོངས་འཛིན་སྨྲ་བའི་དབང་པོ་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག

སྤུ་ལྡེས་རྒྱལ་སྲིད་བཟུང་ནས་བསྟན་པ་བཙུགས་པའི་སྐོར།

          དར་རྒྱས་གསལ་སྒྲོན་དུ་ཇུ་ཐིག་རྒྱུད་འབུམ་གྱི་ལུང་དྲངས་པ་ལས། ལོ་ངམ་རྟ་རྫི་བསད་ནས། སྤུ་ལྡེ་གུང་རྒྱལ་གདན་སར་ཐོན་པ་ཡོད། ཅེས་དང༌། དྲན་པའི་ལུང་བསྟན་ཆུང་བ་ལས། སློབ་དཔོན་སྟོང་རྒྱུང་གནམ་མཚོའི་དོ་ལ་བྱིན་རླབས་བཅུ་གཉིས་ཀྱི་བསྒྲུབ་པ་མཛད་ཅིང་བཞུགས་པ། བཙན་པོ་སྤུ་ལྡེས་གདན་དྲངས་ནས་ཞུས་པ། མཁས་རྟོགས་དོན་དང་ལྡན་པའི་པན་ཊི་ཏ། བདག་ནི་སྔོན་ཚེ་ལྷ་རབས་གཉན་གྱི་སྲས། གཡུང་དྲུང་བོན་གྱི་བརྒྱུད་པ་ཟམ་མ་ཆད། བདག་གི་ཡབ་ཀྱི་ཐུགས་སུ་གདོན་གསོལ་ཏེ། བོན་བསྣུབས་གཤེན་པོ་མཐའ་རུ་སྤྱུགས། བཀའ་ཆད་བདག་ཅག་ཀུན་ལ་བྱུང༌། རྒྱལ་པོ་སྐུ་བཀྲོངས་རྒྱལ་སྲིད་འབངས་ཀྱིས་ཁྱེར། ཡབ་མེས་གོང་མས་བཞེངས་པའི་གསས་ཁང་བཤིགས། ཉང་རོ་ཤམ་པོའི་ཕོ་བྲང་ཐོག་གིས་བསྒྱེལ། ལ་ལ་མཐའ་རུ་སྤྱུགས་ཤིང་ལ་ལ་བྲན་དུ་བཀོལ། ཁྱེད་ཀྱི་ཐུགས་རྗེས་བཟུང་ཞིང་བཀའ་ལ་འདོགས་པར་ཞུ། ཞེས་ཞུས་པས། སྟོང་རྒྱུང་གིས་བོན་གྱི་བསྟན་པ་དར་བར་བྱ་བའི་ཕྱིར། རིག་འཛིན་བརྒྱ་རུ་ཐུགས་རྗེས་བྱིན་གྱིས་བརླབས་ནས། བསྟན་པ་གཏེར་ནས་བཏོན་ཏེ་སྤེལ་བར་དགོངས། ཅེས་པས། གཤེན་པོ་རྣམས་ཀྱིས་རྐོང་ཡུལ་བྲེ་སྣ་རུ། རྒྱལ་གྱི་གྲི་འདུར་མཛད་པས། གསོན་པོར་བཀྲ་ཤིས་ཏེ་སྤུ་ལྡེས་རྒྱལ་ས་ཟིན། གཤིན་གནས་སྤར་ཏེ་གྲི་རུམ་ཐར་པར་དྲངས་སོ། །ད་ལྟ་ཡང་རྒྱལ་གྲི་རུམ་གྱི་གྲི་འདུར་ཡོག་བར་པ་སུམ་བརྒྱ་དྲུག་ཅུ་བྱ་བའི་བོན་ཡོད་དོ། །གཤེན་ལ་ཡང་རྩིགས་སྔར་བཞིན་བྱིན་ནོ། །ཞེས་དང༌།

འབེལ་གཏམ་ལུང་གི་སྙིང་པོ། དུམ་བུ་བརྒྱད་པ།

༸སྐྱབས་རྗེ་སྨན་རིའི་ཡོངས་འཛིན་སྨྲ་བའི་དབང་པོ་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག

གཏེར་ཡིག་དང་གྲི་གུམ་བཀྲོངས་ཚུལ།

          སྤྲུལ་སྐུ་ཀླུ་དགས་འབྲིག་མཚམས་ནས་ཐོན་པའི་དཔེ་བོན་ཅན། གྲི་གུམ་གྱི་དུས་སུ་བྲིས་ཏེ་སྦས་པ་ཡིན་ཏེ། དེའི་དུས་སུ་སྟོང་རྒྱུང་སོགས་མཁས་པ་གོང་མ་བཞིས། སྦས་པར་གསུངས་པའི་ཕྱིར་ཏེ། གླིང་གྲགས་ལས། མཁས་པ་མི་བཞིས་ཐེག་དགུའི་བོན་ཐམས་ཅད་དྲིལ་ནས་མཚོ་རྔའི་བྲག་གུ་ཀ་རུ་ལ་སྦས། ཞེས་གསུངས།

          གཞན་ཡང་གོང་དུ་བཤད་པ་ལྟར་བྱང་འབྲོག་གི་ས་གནས་ཟང་ཟང་ལྷ་བྲག་དྭང་ར་ཁྱུང་རྫོང་ཟར་གྱི་སྟག་སྣ་སོགས་ནས་ཐོན་པའི་བོན་ཡང་འདི་དང་མཚུངས་སོ། །རང་གིས་མཐོང་མྱངས་བའི་གཤེན་གཏེར་གྱི་བུ་དཔེ་ཁམས་ཆེན་ནག་ཕྲན་མ་ཞུ་རི་ཞིང་དུ་བཞུགས་པ་དེ་ནི་ཡིག་གཟུགས་འབྲུ་མ་ལྟ་བུ་རྐང་པ་རིང་ཙམ་ཅན་འགོ་ནས་མཇུག་བར་ཆ་མཉམ་པ་ཤོག་གུ་སྦྱར་མ་འཐུག་པོ་སྣག་ཚ་ནག་པོ་ཁོ་ནས་བྲིས་པ་སྐབས་འགར་འབྲུ་དག་མེད་པ་རྣམས་ཀྱི་ཐད་དུ་གཤེན་གྱི་བླ་དཔེ་ལ་ཡང་འདི་ལྟར་འདུག་ཅེས་མཆན་དུ་བྲིས་འདུག །

          མདོར་ན་རྒྱལ་པོ་མུ་ཁྲིས་རྒྱལ་བསྟན་གྱི་སྲོལ་བཙུགས་ནས་བཟུང་བོད་ཡིག་དང་རྒྱལ་བསྟན་རིན་པོ་ཆེ་རྩ་ཉམས་སུ་མ་སོང་སྟེ། གྲི་གུམ་གྱི་དུས་སུ་ཡང་ལྷ་བོན་སྒོ་བཞི་དང་གེ་ཁོད་ཐིས་འཕན། ཅོ་གྱིམ་བུ་ལན་ཙ་རྣམས་བདག་གི་སྐུ་བསྲུང་དུ་བཞུགས་འཚལ། ཞེས་གསུངས་པའི་ཕྱིར། དེ་ནས་རྒྱལ་པོ་ཁྲི་སྲོང་གི་བར་དུ་བོན་ལ་གནོད་པ་མ་བྱུང་བར་དར་རྒྱས་སུ་བྱུང་བའི་ཕྱིར་རོ། །