བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན།
ཕྱི་ལོ་ ༢༠༡༩ ཟླ་ ༡ ཚེས་ ༢༥
ཀ༽ རྒྱལ་ཡོངས་འོས་བསྡུ།
 |
| དཔའ་བོའི་ཁྱུ་མཆོག་ལི་ཐང་ཨ་འབྲུག་མགོན་པོ་བཀྲ་ཤིས། |
 |
| ཆུ་སྒང་གཙོ་འཛིན་ལི་ཐང་ཨ་ཐར་ནོར་བུ། |
དཔལ་ལྡན་བཀའ་བློན་ཁྲི་ཟུར་སྡེ་དགེ་འཇུ་ཆེན་ཐུབ་བསྟན་རྣམ་རྒྱལ་མཆོག་གིས་སྐུ་ངལ་མང་པོ་བསྐྱོན་གནང་སྟེ། ཕྱི་ལོ་ ༢༠༠༠ ཟླ་ ༩ ཚེས་ ༢༡ འཁོད་ཆུ་སྒང་དབུས་རྒྱུན་ལས་ནས་སྔར་འགྱོད་ཕྱིས་བསྡོམས་ཀྱི་དགོངས་སེལ་མཚན་འཁོད་སྙན་ཞུ་བཀའ་བློན་ཁྲི་ཟུར་འཇུ་ཆེན་ཐུབ་བསྟན་བརྒྱུད་༸གོང་ས་༸སྐྱབས་མགོན་ཆེན་པོ་མཆོག་ལ་ཕུལ།
 |
| བཀའ་སྤྱི་གཉིས་ཀྱི་བཀའ་ཡིག |
༢༠༠༠ ལོའི་ཟླ་ ༡༢ ཚེས་ ༤ ཉིན་མདོ་སྟོད་ཆུ་སྒང་རྒྱུན་ལས་གསར་འདེམས་ལས་དོན་ཚོགས་ཆུང་གིས་འགན་ཁུར་འོག་༸གོང་ས་མཆོག་ལ་ཆུ་བཞི་སྒང་དྲུག་གི་བརྟན་བཞུགས་ཐེངས་
༤ པ་ཕུལ། སྐབས་དེར་ཉེ་ཆར་༸གོང་ས་༸སྐྱབས་མགོན་ཆེན་པོ་ལྷ་དགོངས་གསལ་དྭངས་ཀྱི་སྐལ་བཟང་དང་ལྡན་ཏེ། བཀའ་སྤྱི་གཉིས་ནས་འདས་པའི་གནས་རྙོག་ཡོངས་སུ་གསལ་དག་བྱུང་བ་དང༌། སླད་ཕྱིན་གཞུང་མང་དམ་གཙང་གི་གནས་སྟངས་ཆགས་པའི་ངོ་སྤྲོད་བཀའ་ཁྱབ་གསལ་བསྒྲགས་གནང་བ། ད་ནས་ཆུ་སྒང་ཚོགས་པ་གཅིག་ལས་མེད་པ་ཆགས་པའི་སྒོ་ནས་ད་བར་དུ་ཕྱོགས་གཉིས་ཆགས་པའི་མི་ངོ་ལྷན་འཛོམས་ཀྱིས་མདོ་ཁམས་ཆུ་སྒང་གིས་བརྟན་བཞུགས་བསྟར་འབུལ་ཞུ་བཞེས་དང་འབྲེལ་བའི་གཉིས་མོས་དམ་འབུལ་གྱི་ཐོ་ཡིག་ཀྱང་སྙན་སྒྲོན་ཞུས།
མདོ་སྟོད་ཆུ་སྒང་རྒྱུན་ལས་གསར་འདེམས་ལས་དོན་འགན་ཁུར་ཚོགས་ཆུང་གིས་འགན་ཁུར་ཐོག་བོད་གཞུང་བཀའ་ཤག་ནས་གཞུང་ཞབས་རྣམས་ཆེད་གཏོང་གནང་བ་དང༌། མདོ་སྟོད་རྒྱལ་ཡོངས་མི་མང་ནས་གུས་བརྩི་དྭང་ལེན་གྱི་མདོ་སྟོད་ཆུ་སྒང་རྒྱུན་ལས་ཀྱི་སྔོན་འགྲོའི་འོས་བསྡུ་ཟིན་མཚམས་རྡ་སར་ཡོད་པའི་ཆུ་སྒང་ཚོགས་པ་སོགས་ཀྱིས་རྙོག་གཞི་བསླངས་ཏེ་དངོས་གཞིའི་འོས་བསྡུ་རྒྱུར་དུས་འགྱངས་གྱུར།
ཕྱི་ལོ་ ༢༠༠༡ ཟླ་ ༩ ཚེས་ ༢༡ ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་“སྤྱི་ཡོངས་སྔོན་འགྲོའི་འོས་བསྡུ་མང་གཙོའི་ལམ་ལུགས་དང་མཐུན་པ་ཚད་ལྡན་བྱུང་བ་རྩ་འཛིན་དང༌། སྐབས་འདིར་དངོས་གཞི་འོས་བསྡུ་བྱ་མ་ཐུབ་པའི་འོག་ནས་ལྡི་ལི་ཆུ་སྒང་དབུས་རྒྱུན་ལས་ཟེར་བ་དང༌། རྡ་སར་ཆུ་སྒང་དབུས་རྒྱུན་ལས་ཟེར་བ་ཕན་ཚུན་ནས་ནང་རྩོད་རྙོག་གླེང་གི་ཡིག་ཆ་སྤེལ་རེས་ཀྱི་འགོ་ཚུགས་པས་བོད་བསྟན་སྲིད་ལ་གནོད་འགལ་འགྲོ་གཞི་བཟོ་བཞིན་པར་བརྟེན། བསྟན་སྲིད་མི་རིགས་ལ་གནོད་གཞི་འདི་རིགས་མི་འབྱུང་ཆེད་མདོ་སྟོད་རྒྱལ་ཡོངས་སེར་སྐྱ་ཡོངས་ཀྱི་འོས་བསྡུའི་ལམ་ནས་མདོ་སྟོད་ཆུ་སྒང་རྒྱུན་ལས་འདི་ཡིན་ཟེར་བ་ཞིག་མ་བྱུང་གི་བར། ད་ནས་བཟུང་ཆུ་སྒང་དབུས་རྒྱུན་ལས་ཟེར་བ་ཁག་གཉིས་ཡོད་པ་འདི་ངོས་ལེན་བྱེད་རྒྱུ་མིན་པའི་གྲོས་ཆོད་”ཡིག་ཆ་ཨང་ ༩ པ་སྤྱི་མོས་ཀྱིས་བཞག་གནང་བར་༸གོང་ས་མཆོག་གིས་བཀའ་འཁྲོལ་མཚན་རྟགས་བསྩལ།
 |
| བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཆོད་ཡིག་ཆ་ཨང་ ༩ པ། |
མདོ་སྟོད་ཆུ་སྒང་རྒྱུན་ལས་གསར་འདེམས་ལས་དོན་འགན་འཁུར་ཚོགས་ཆུང་གིས་སྔོན་འགྲོའི་འོས་གཞི་རྩ་འབོར་ནས་མང་མོས་རྩེ་བཏོག་གིས་མི་གྲངས་ ༥༢ འོས་གཞིར་བཏོན་ཏེ་མདོ་སྟོད་རྒྱལ་ཡོངས་མི་མང་གིས་འོས་ཤོག་འཕངས་གནང་བ་དང་། ཕྱི་ལོ་ ༢༠༠༡ ཟླ་ ༡༢ ཚེས་ ༧ ནས་ཉིན་གསུམ་རིང་མདོ་སྟོད་སྤྱི་འཐུས་ ༡༠ ནས་ཚོགས་འདུའི་གཙོ་སྐྱོང་གནང་ཞིང་། སྐུ་སྒེར་ཡིག་ཚང་གིས་འགྲོ་གྲོན་བཏང་སྟེ་གངས་ཅན་སྐྱིད་གཤོངས་ཀྱི་སྤྱི་ཐབ་ཚོགས་ཁང་ནང་མདོ་སྟོད་དམིགས་བསལ་ཚོགས་ཆེན་སྐོང་ཚོགས་གནང་བ་དང༌། ཚོགས་འདུ་དེའི་ཐོག་ཏུ་བཙན་བྱོལ་བོད་གཞུང་གི་ཁྲིམས་ཞིབ་པ་རྣམ་པ་དང༌། བཀའ་བློན་ཁྲི་པ་མཆོག་དང༌། བཀའ་བློན་རྣམ་པ། སྤྱི་འཐུས་ཚོགས་གཙོ་ཚོགས་གཞོན་དང་། རྒྱུན་ལས། རང་དབང་ཅན་གྱི་འགན་འཛིན་རྣམ་པ། ལྷན་ཁང་ཁག་གི་དྲུང་ཆེ་ཆུང་སོགས་མཛད་གཙོ་རྣམ་པ་དབུ་འབྱེད་མཛད་སྒོར་ཆེད་ཕེབས་གནང་།
ཚོགས་ཐོག་ཏུ་འོས་སྒམ་དམ་འབྱར་གྱི་འོས་ཤོག་གྲངས་བཤེར་བྱེད་པོ་ཚོགས་ཆེན་ནས་མི་འགྲོ་གྲངས་ ༡༡
བསྐོ་འདེམས་ཀྱིས་འོས་ཤོག་གྲངས་བཤེར་གྱི་ཨང་རིམ་བཀོད་པ་ནས་དགོངས་ཞུ་བྱེད་མཁན་རེ་ཟུང་ཕུད་མི་གྲངས་ ༡༡
འོས་ཤོག་གི་གྲངས་འབོར་རྩེ་བཏོག་གིས་གཏན་འཁེལ་གནང་བ་དང་འབྲེལ་རྒྱུན་ལས་གསར་རྙིང་རྣམས་ལ་ལེགས་དར་འབུལ་བ་སོགས་གནང་སྒོ་མཐའ་དག་ལེགས་པར་གྲུབ་སྟེ། མདོ་སྟོད་སྤྱི་འཐུས་ཚུལ་ཁྲིམས་བསྟན་འཛིན་དང༌། འཆི་མེད་རྡོ་རྗེ་གཉིས་ཀྱི་ཚོགས་གཙོ་དང༌། ཚོགས་གཞོན་གནང་བའི་མཚན་ཐོག་ནས་ཡིག་ཆ་ཨང་ ༩
པའི་འབྲུ་དོན་ལྟར་སྤྱི་འཐུས་གྲོས་ཚོགས་དང༌། བཀའ་ཤག
ཆེས་མཐོའི་ཁྲིམས་ཞིབ་ཁང་བཅས་པར། མདོ་ཁམས་ཆུ་བཞི་སྒང་དྲུག་སྒྲིག་འཛུགས་ཀྱི་དབུས་རྒྱུན་ལས་འདི་རྣམས་གཏན་འཁེལ་བ་ཡིན་པ་དང༌། སླད་ལོ་གསུམ་རེའི་མཚམས་འཕོ་ལེན་བྱ་རྒྱུ་བཅས་ཀྱི་ཡིག་ཆ་ཁུངས་སོ་སོར་འབུལ་ལམ་ཞུས་པ་སོགས་ཚུལ་དང་ལྡན་པའི་ཐོག་ནས་གཏན་འཁེལ་གནང་།
སྐབས་དེར་སྨན་རྩིས་ཁང་དུ་ཚོགས་པའི་ཆུ་སྒང་གསར་པ་ཟེར་བའི་ཚོགས་འདུའི་ཐོག་ལི་ཐང་ཨ་ཐར་དང༌། གྲའུ་དཔོན་རིན་ཆེན་ཚེ་རིང༌། པདྨ་བདེ་ལེགས་སོགས་མི་གྲངས་ ༡༧ རྒྱ་མི་དམར་ནག་གཉིས་ཀྱི་མི་ཡིན་ཞེས་པ་དང་། སྤྲུལ་སྐུ་ཨོ་རྒྱན་སྟོབས་རྒྱལ་སོགས་མདོ་སྟོད་སྤྱི་འཐུས་
༨
སྤྱི་འཐུས་ལ་མི་འོས་པའི་གྲོས་ཆོད་བཞག་པར་བརྟེན་ཆེས་མཐོའི་ཁྲིམས་ཞིབ་ཁང་དུ་ ༢༠༠༡།༡༢།༡༣ ནས་ ༢༠༠༤།༧།༧ བར་ཁ་མཆུ་ཨང་ ༩ པ། དགྲ་བོ་དམར་ནག་གཉིས་དང་འབྲེལ་བ་ཡོད་མེད།
ཅེས་དང་། ༢༠༠༢།༣།༡༦ ནས་
༢༠༠༤།༨།༦ བར་ཁ་མཆུ་ཨང་ ༡༠ པ། བཅའ་ཁྲིམས་དང་ཁྲིམས་ལུགས་ལ་བརྩི་བཀུར།
ཞེས་པའི་ཁ་མཆུ་གཉིས་གཏུགས་པར་རིམ་བཞིན་རྒྱལ་ཁ་ཐོབ། གྱོད་ཡ་རྩོད་ལན་པས་བཅད་ཁྲ་ཉམས་ལེན་མ་བྱས་པ་དང་།
ཡུལ་ཁྲིམས་དུ་གཏུགས་པ། ཁྱད་གསོའི་ཆད་འགེལ་བཀའ་ཁྱབ་བཅས་ལ་བརྩི་བཀུར་ཉམས་ལེན་མ་ཞུས་པས།
གྱོད་ཡ་རྩོད་ལན་པ་ ༡༽ ཕུ་པ་ཚེ་རིང་སྟོབས་རྒྱལ་དང༌། ༢༽ ར་སྟོད་བསོད་ནམས། ༣༽ ཐུབ་བསྟན་ལེགས་བཤད། ༤༽ སོག་ཞབས་དྲུང༌། ༦༽ ཀླུ་ཁྲི་སྐལ་བཟང་ནོར་བུ། ༦༽ དབང་གྲགས་མགོན་པོ་བཅས་ལ་བཙན་བྱོལ་བོད་མིའི་སྤྱི་ཚོགས་ཀྱི་གདམ་བྱ་འདེམས་བྱེད་ཀྱི་ཐོབ་ཐང་འཕྲོག་པ་བྱུང་ཡོད།
ཚོགས་ཐོག་དེར་འོས་ཤོག་གྲངས་བཤེར་རྗེས་འདེམས་ཐོན་བྱུང་བའི་དབུས་རྒྱུན་རྣམས་སྐབས་ ༡༦
པའི་མདོ་ཁམས་ཆུ་བཞི་སྒང་དྲུག་གི་དབུས་རྒྱུན་ལས་ཆགས་ཡོད་པ་དང་། དེ་རྗེས་སྐབས་
༡༧ པ་དང་། སྐབས་
༡༨ པ། སྐབས་
༡༩ པ། སྐབས་
༢༠ པ། ད་ལྟའི་སྐབས་
༢༡ པའི་རྒྱུན་ལས་བཅས་རྒྱལ་ཡོངས་འོས་བསྡུའི་ལམ་ནས་རིམ་བཞིན་གསར་འདེམས་གནང་ཡོད། འོས་བསྡུ་ཚོགས་ཆུང་བསྐོ་ཕྱོགས་དང་། རྒྱུན་ལས་ཀྱི་འོས་ཆོས་སོགས་སྒྲིག་གཞིའི་ནང་ཁ་གསལ་བཀོད་ཡོད།
ཁ༽ ད་ལྟའི་གནས་སྟངས།
ད་ལྟའི་ཆར་མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་རྒྱ་གར་གྱི་རྒྱལ་ས་ལྡི་ལིར་ཆགས་ཡོད་ཅིང་།
བཞུགས་སྒར་རྡ་རམ་ས་ལར་དབུས་ཡན་ལག་ལས་ཁུངས་ཡོད། ༡༩༩༢
ལོར་དེབ་སྐྱེལ་བྱས་པའི་དམིགས་ཡུལ་གཞིར་བཟུང་སྤྱི་ཚོགས་བདེ་དོན་ཚོགས་པའི་ངོ་བོ་དང་།
རང་རེ་བཙན་བྱོལ་བའི་གནས་བབ་ཀྱི་ཆ་ནས་མདོ་སྟོད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་ཡང་ཆགས་ཡོད།
སྒྲིག་གཞིའི་ནང་རྒྱུན་ལས་མང་མཐའ་ ༡༥ ནས་ཉུང་མཐར་ ༧
བར་ཡོད་ཆོག་པ་ལྟར་ད་ལྟ་རྒྱུན་ལས་མི་གྲངས་ ༡༡ ཡོད། དེའི་ནང་ཚོགས་གཙོ་གཅིག་དང་།
ཚོགས་གཞོན་གཉིས། དྲུང་ཆེ། དྲུང་གཞོན། དངུལ་གཉེར། མཐུན་འབྲེལ་འགན་འཛིན།
རྒྱུན་ལས་གཞན་བཅས་ཡིན། དོན་གྲུབ་གླིང་དུ་རྒས་གསོ་ཁང་ཞིག་དང། རྡ་སར་ཆུ་སྒང་རིག་གནས་འཛིན་གྲྭ།
གཞན་ཡང་ཆུ་སྒང་དགེ་རྩ་ཚོགས་པ། ཆུ་སྒང་ཤེས་ཡོན་སྡེ་ཚན་བཅས་ཡོད།
རྒྱ་བལ་གཉིས་དང་ཕྱི་རྒྱལ་ཡུལ་གྲུ་ཁག་བཅས་སུ་ཆུ་སྒང་ས་གནས་ཡན་ལག་ཁག་
༤༥ ཙམ་ཡོད་པ་དང་དེ་དག་གི་རྒྱུན་ལས་རྣམས་ཀྱང་སྒྲིག་དོན་འོས་བསྡུ་བྱེད་བཞིན་ཡོད།
ལས་དོན་གནང་ཕྱོགས་ཐད་མདོ་ཁམས་ཆུ་བཞི་སྒང་དྲུག་ཚོགས་པའི་སྒྲིག་གཞི། དོན་ཚན་ ༥༤ ཅན་དང་། མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་རྣམ་པའི་ལས་དོན་བྱེད་ཕྱོགས་དང་ཐོབ་ཐང་བཅས་ཀྱི་སྒྲིག་གཞི།
དོན་ཚན་ ༡༣ ཅན།
མདོ་ཁམས་ཆུ་བཞི་སྒང་དྲུག་ཚོགས་པའི་དངུལ་རྩིས་སྟངས་འཛིན་བྱེད་ཕྱོགས་ཀྱི་སྒྲིག་གཞི། དོན་ཚན་
༡༦ ཅན་བཅས་གཏན་འབེབས་ཀྱིས་ལག་བསྟར་གནང་བཞིན་ཡོད།
ལོ་གསུམ་རེའི་མཚམས་ཚོགས་ཆེན་རེ་དང་།
ལོ་གཅིག་དང་ཕྱེད་རེའི་མཚམས་འགན་འཛིན་ལྷན་ཚོགས་རེ་ཚོགས་བཞིན་ཡོད་ཅིང་། ཟླ་བཞི་རེའི་མཚམས་རྒྱུན་ལས་ལྷན་ཚོགས་རེ་ཚོགས་བཞིན་ཡོད།
ཚོགས་འདུ་སོ་སོར་གོ་བསྡུར་ཐག་གཅོད་ཇི་བྱུང་ལྟར་འགྲོ་གྲོན་གཏོང་ཕྱོགས་དང་། རྩིས་ཞིབ་པ་བསྐོ་གཞག
སློབ་ཡོན་སྦྱོར་སྤྲོད། རྒན་རབས་ཀྱི་འཚོ་སྣོན། སྤྱི་ཚོགས་ཞབས་ཞུ་སོགས་ལས་དོན་ཁག་སྒྲུབ་བཞིན་ཡོད།
ལོ་བསྟར་ཆགས་སུ་ཕྱི་ཟླ་ ༦ པའི་ཚེས་ ༡༦
ཉིན་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་དབུ་བརྙེས་པའི་དུས་དྲན་སྲུང་བརྩི་ས་གནས་གང་སར་ཞུ་བཞིན་པ་དང་།
དམིགས་བསལ་བཞུགས་སྒར་རྡ་རམ་ས་ལར་སྤྱི་འཐུས་ཚོགས་གཙོ་ཚོགས་གཞོན་ནམ། སྤྱི་འཐུས་རྒྱུན་ལས་ཀྱི་སྐུ་ཚབ་སྐུ་མགྲོན་གཙོ་བོར་ཆེད་ཕེབས་ཀྱིས་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོག་སྦྱོང་གནང་གི་ཡོད།
བཙན་བྱོལ་བོད་མིའི་བཅའ་ཁྲིམས་དགོངས་དོན་དམིགས་བསལ་ཚོགས་ཆེན་དང་།
གཞན་བོད་གཞུང་མང་རྒྱལ་ཡོངས་ཚོགས་ཆེན་སོགས་སུ་བཀའ་སྤྱི་གཉིས་ནས་ཆུ་སྒང་དབུས་རྒྱུན་ལ་གཞུང་འབྲེལ་མ་ཡིན་པའི་ཚོགས་པའི་མིང་ཐོག་ནས་མགྲོན་འབོད་དང་།
རྒྱུན་ལྡན་འབྲེལ་ལམ་ཁག་གནང་བཞིན་ཡོད་པ་བཅས་ཀྱི་གནས་སྟངས་སྙིང་བསྡུས་སུ།།
རྩོམ་ཐུང་འདི་ནི་ཕྱི་ལོ་ ༢༠༡༩ ཟླ་ ༡ ཚེས་ ༢༥ ཉིན་ལྡི་ལི་ཆུ་སྒང་དཔའ་བོའི་རྗེས་དྲན་ཚོགས་ཁང་དུ་མདོ་ཁམས་ཆུ་བཞི་སྒང་དྲུག་དབུས་རྒྱུན་སྐབས་ ༢༡ པའི་ཤེས་ཡོན་སྡེ་ཚན་ནས་གོ་སྒྲིག་གིས་མདོ་ཁམས་ཆུ་བཞི་སྒང་དྲུང་དང་འབྲེལ་བའི་ངོ་ལོ་ ༦༠ རིང་གི་ལོ་རྒྱུས་བགྲོ་གླེང་ཞེས་པའི་གཏམ་བཤད་ཀྱི་ས་བོན་དུ་བྲིས།
 |
| སྐབས་ ༢༡ པའི་མདོ་ཁམས་ཆུ་བཞི་སྒང་དྲུག་གི་དབུས་སྤྱི་ཁྱབ་རྒྱུན་ལས་རྣམ་པ། |
No comments:
Post a Comment