 |
| ༸སྐྱབས་རྗེ་སྨན་རིའི་ཡོངས་འཛིན་སྨྲ་བའི་དབང་པོ་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག |
སྤུ་ལྡེས་རྒྱལ་སྲིད་བཟུང་ནས་བསྟན་པ་བཙུགས་པའི་སྐོར།
དར་རྒྱས་གསལ་སྒྲོན་དུ་ཇུ་ཐིག་རྒྱུད་འབུམ་གྱི་ལུང་དྲངས་པ་ལས།
ལོ་ངམ་རྟ་རྫི་བསད་ནས། སྤུ་ལྡེ་གུང་རྒྱལ་གདན་སར་ཐོན་པ་ཡོད། ཅེས་དང༌། དྲན་པའི་ལུང་བསྟན་ཆུང་བ་ལས།
སློབ་དཔོན་སྟོང་རྒྱུང་གནམ་མཚོའི་དོ་ལ་བྱིན་རླབས་བཅུ་གཉིས་ཀྱི་བསྒྲུབ་པ་མཛད་ཅིང་བཞུགས་པ།
བཙན་པོ་སྤུ་ལྡེས་གདན་དྲངས་ནས་ཞུས་པ། མཁས་རྟོགས་དོན་དང་ལྡན་པའི་པན་ཊི་ཏ། བདག་ནི་སྔོན་ཚེ་ལྷ་རབས་གཉན་གྱི་སྲས།
གཡུང་དྲུང་བོན་གྱི་བརྒྱུད་པ་ཟམ་མ་ཆད། བདག་གི་ཡབ་ཀྱི་ཐུགས་སུ་གདོན་གསོལ་ཏེ། བོན་བསྣུབས་གཤེན་པོ་མཐའ་རུ་སྤྱུགས།
བཀའ་ཆད་བདག་ཅག་ཀུན་ལ་བྱུང༌། རྒྱལ་པོ་སྐུ་བཀྲོངས་རྒྱལ་སྲིད་འབངས་ཀྱིས་ཁྱེར། ཡབ་མེས་གོང་མས་བཞེངས་པའི་གསས་ཁང་བཤིགས།
ཉང་རོ་ཤམ་པོའི་ཕོ་བྲང་ཐོག་གིས་བསྒྱེལ། ལ་ལ་མཐའ་རུ་སྤྱུགས་ཤིང་ལ་ལ་བྲན་དུ་བཀོལ། ཁྱེད་ཀྱི་ཐུགས་རྗེས་བཟུང་ཞིང་བཀའ་ལ་འདོགས་པར་ཞུ།
ཞེས་ཞུས་པས། སྟོང་རྒྱུང་གིས་བོན་གྱི་བསྟན་པ་དར་བར་བྱ་བའི་ཕྱིར། རིག་འཛིན་བརྒྱ་རུ་ཐུགས་རྗེས་བྱིན་གྱིས་བརླབས་ནས།
བསྟན་པ་གཏེར་ནས་བཏོན་ཏེ་སྤེལ་བར་དགོངས། ཅེས་པས། གཤེན་པོ་རྣམས་ཀྱིས་རྐོང་ཡུལ་བྲེ་སྣ་རུ།
རྒྱལ་གྱི་གྲི་འདུར་མཛད་པས། གསོན་པོར་བཀྲ་ཤིས་ཏེ་སྤུ་ལྡེས་རྒྱལ་ས་ཟིན། གཤིན་གནས་སྤར་ཏེ་གྲི་རུམ་ཐར་པར་དྲངས་སོ།
།ད་ལྟ་ཡང་རྒྱལ་གྲི་རུམ་གྱི་གྲི་འདུར་ཡོག་བར་པ་སུམ་བརྒྱ་དྲུག་ཅུ་བྱ་བའི་བོན་ཡོད་དོ།
།གཤེན་ལ་ཡང་རྩིགས་སྔར་བཞིན་བྱིན་ནོ། །ཞེས་དང༌།
བསྒྲགས་པ་གླིང་གྲགས་ལས། སྤུ་ལྡེ་གུང་རྒྱལ་གྱིས་གོང་དུ་ཡབ་ཀྱིས་བོན་གཤེན་བསྣུབས་པའི་བཀའ་ཆད་ཆེས་པས།
བསྟན་པའི་དབུ་ཡོགས་དངོས་པོར་བསྟན་པས། སྐུ་གཤེན་ཕྱོགས་སུ་བསྐྱོད་པའི་བླ་མ་དམ་པ་གདན་དྲངས་ལ།
བསྟན་པ་གཏེར་དུ་ནུབ་པ་ཀུན་གདན་འདྲེན་པ་དང༌། སླད་མ་ཡང་བོན་ལ་བློ་གཏོད་པ། བོད་ཡུལ་ན་མེད་པ་ཡང་ཞང་ཞུང་སྟག་གཟིག་ཨོ་རྒྱན་གྱི་ཡུལ་ནས་གདན་འདྲེན་ལ།
བསྟན་པ་སྤེལ་བར་དམ་བཅའ་བྱས༼དེ་སྐོར་གྱི་རྣམ་ཐར་རྒྱས་པ་རིག་འཛིན་གྱི་རྒྱུད་ན་གསལ་བར་བཞུགས་ཡོད༽
དེ་དུས་བོན་གཤེན་ཀུན་སྤྱན་དྲངས་པ་ལ། བོན་གཤེན་ཀུན་བཀའ་བགྲོས་ནས། བསྟན་པ་སྤེལ་བའི་ཆེད་དུ།
གཏེར་བདག་དང་ལྷ་སྲིན་གྱིས་མ་བསྒྲིབས་པའི་གཏེར་ཁ་ཡར་ལས་མ་ཐོན། སྐད་རིགས་མི་གཅིག་པའི་ཡུལ་ན་ཡང༌།
གཡུང་དྲུང་གི་བོན་ཚོལ་བའི་གཤེན་པོར་གསེར་ཕྱེ་མ་དངུལ་ཁྲོལ་བུ་གཡུ་སྦྲམ་པོ་ལ་སོགས་བསྐུར་བཏང་བ་ལ།
མེ་ཉག་གི་བོན་པོ་དཔལ་ལེགས་རྒྱལ་མཚན། མཚེ་མི་རིངས་སྐྱོལ་པོ་དེ་གཉིས་ཀྱིས། ཞང་ཞུང་གི་ཡུལ་དུ་ཕྱིན་ཏེ།
སྟོན་པ་མ་རྒྱུད་རྒྱལ་མཚན་ཞེས་པ་བོན་གྱི་མཛོད་སྒོ་གང་ལས་ཀྱང་མ་འགགས་པར་མཁྱེན་པ། ཁྱད་པར་དུ་ཡང་འབུམ་སྡེ་ལྔ་དང་བོན་སྒོ་བཅུ་གཉིས་ལ་མཁས་པ་ཞིག་དང༌།
སྟོན་པ་ལྷ་ཁྱུང་བྱ་བ་ཐེག་པ་རིམ་དགུའི་བོན་ལ་མཁས་པ། འཕྲ་བའི་འབུམ་བཅུ་གཉིས་ཞལ་འདོན་དུ་སྒྲོགས་པ།
ཁྱད་པར་དུ་ཡང་སྔགས་ཟབ་མོའི་དོན་ལ་གྲུབ་པ་བསྙེམས་པ། བླ་མ་དེ་གཉིས་ལ་རིན་པོ་ཆེའི་ཞུགས་ཏོག་ཕུལ་ནས་འདི་སྐད་ཞུས་སོ།
།ཀྱཻ་ལྷ་ཡི་སྲས་པོ་གཤེན་རབ་བླ་མ་ལགས། ཐབས་མཁས་ཐུགས་རྗེ་ཀུན་གྱི་དཔལ། བརྗིད་པའི་སྐུ་ནི་རི་རབ་ལྷུན་པོ་འདྲ།
དྲག་པོའི་གསུང་ནི་ཚངས་པའི་གསུང་ལྟར་སྒྲོགས། ཡོན་ཏན་ཐུགས་ནི་རྒྱ་མཚོ་ཆེན་པོའི་ཀློང༌།
མཁྱེན་པའི་ཡོན་ཏན་ཉི་མའི་ཟེར་ལྟར་སྤྲོ། སྤྲུལ་སྐུའི་འཕྲིན་ལས་འགྲོ་དོན་རྣམ་གཉིས་མཛད།
ཉིད་ཀྱི་སྐུ་ལ་བདག་ཅག་རབ་ཏུ་འདུད། སྣོད་ཀྱི་འཇིག་རྟེན་འཛམ་གླིང་སོག་ཁའི་དབུས། གངས་རིའི་ར་བ་རིན་ཆེན་བདལ་བའི་གླིང༌།
བཅུད་ཀྱི་སེམས་ཅན་འགྲོ་བ་གྲངས་མང་ཡང༌། ནམ་མཁའ་འདབ་ཆགས་བྱ་ཁྱུང་གསུམ་པ་ལགས། དེ་ཡི་རྗེ་བོ་གཡུ་བྱ་ཁུ་བྱུག་ལགས།
སའི་མ་མ་མི་རིགས་སྡེ་བཞི་ལགས། མི་རྗེས་ལྷས་མཛད་གཉའ་ཁྲི་བཙན་པོའི་གདུང༌། དགུང་ལས་དོག་ལ་བྱོན་པ་ངོ་མཚར་ཆེ།
གདན་འདྲེན་ཤུལ་དག་གཡུང་དྲུང་བོན་གྱིས་མཛད། མངའ་ཐང་རྒྱལ་སྲིད་བོན་གྱིས་བསྐྱེད། རྒྱལ་སྲིད་མཐོ་ཡིས་བཀའ་ཡི་བསྟན་པ་སྤེལ།
རྗེ་བཙན་ལྷ་གཤེན་སྐྱབས་ཀྱིས་ཀུན་ཀ་སྐྱིད། གྲི་གུམ་བཙན་པོ་ལོག་ལྟ་བདུད་ཀྱི་རིགས། ཁྱབ་པ་བདུད་ཀྱི་སྤྲུལ་པ་དངོས་པོར་བསྟན།
བསྟན་པའི་སྒྲོན་མེ་མུན་པའི་ཁུང་དུ་བསད། རྒྱུད་ལུང་མན་ངག་བསྟན་པ་གཏེར་དུ་སྦས། བསྟན་པའི་དབུ་ཡོགས་མ་ཐོག་མྱུར་དུ་བྱུང༌།
སྤུ་ལྡེ་གུང་རྒྱལ་ཐུགས་ལ་འགྱོད་པ་སྐྱེས། ལྷ་གཤེན་བོན་སྐྱོང་རྣམས་ལ་གདུང་བ་ཕུལ། བཀའ་ཡི་བསྟན་པ་རྒྱ་ཆེར་སྤེལ་བའི་ཕྱིར།
རིན་ཆེན་འཕྲ་མོའི་ཞུགས་ཏོག་བདག་ལ་བརྫངས། གཤེན་རབས་བླ་མའི་སྐུ་ལ་མཆོད་པ་འབུལ། ཉོན་མོངས་ནད་ཀྱིས་གདུང་བ་བསལ་ཕྱིར་དུ།
སྤུ་རྒྱལ་རྗེ་འབངས་སྤྱན་སྔར་གཤེགས་པར་ཞུ། ཞུས་པས། བཀའ་གནང་སྟེ། བོད་ཡུལ་དུ་འབུམ་སྡེ་ལྔ།
བོན་སྒོ་བཅུ་གཉིས་དང༌། བོན་གྱི་མཛོད་སྒོ་མང་པོ་དང་འཕྲ་མོ་བཅུ་གཉིས་དང༌། ཐེག་པ་ཐ་དད་ཀྱི་བོན་མང་པོ་སྤེལ་ནས།
བསྟན་པ་ཡང་རྒྱས་སོ། །རྗེ་བཙན་པོའི་སྐུ་རིང་ལ། བླ་ཡི་སྐུ་གཤེན་རེ། སྐུ་བསྲུང་གི་གཤེན་པོ་རེ་རེ།
རྒྱལ་སྲིད་འཚོ་བ་ལགས་སོ། །ཞེས་དང༌། བོན་རིའི་དཀར་ཆག་ལས། གསོན་ལ་བཀྲ་ཤིས་ཤི་བ་འདྲེན་པ་དང༌།
སྤུ་ལྡེས་རྒྱལ་ས་ཟིན་པའི་སྨོན་བསྐྱེད་ནས། དེ་དུས་ཞང་ཞུང་སྟོང་རྒྱུང་མཐུ་ཆེན་དང༌། མཁས་པ་མི་དགུ་ལས་སོགས་ཐམས་ཅད་ཀུན།
བྱང་གི་གནམ་མཚོ་ཕྱུག་མོའི་ཡང་དབེན་དུ། བྱིན་རླབས་བཅུ་ཡིས་བསྒྲུབ་པ་མཛད་པའི་ཚེ། སྲས་པོ་སྤུ་ལྡེ་ཡག་པ་དེ་ཉིད་ཀྱིས།
ཞང་ཞུང་མཁས་པ་དགུ་ཡི་དྲུང་དུ་སོང༌། མོས་གུས་དད་པའི་ཞུ་བ་སྤོབས་པས་ཕུལ། སྟོང་རྒྱུང་ལས་སོགས་མི་དགུ་བཅས་པ་རྣམས།
གྲི་གུམ་བཙན་པོ་ཐར་པ་དྲངས་པ་དང༌། གཡུང་དྲུང་བོན་གྱི་བསྟན་པ་སྤེལ་དགོངས་ནས། སྤྱན་དྲངས་གཤེགས་ནས་རྐོང་ཡུལ་བྲེ་སྣར་ཕེབས།
རྒྱལ་གྱི་གྲི་འདུར་སུམ་བརྒྱ་རྩ་བརྒྱད་མཛད། གྲི་གཤེད་བཏུལ་ཞིང་གྲི་གུམ་ཐར་པར་དྲངས། ཤི་བ་གནས་དྲངས་གསོན་པོ་བཀྲ་ཤིས་ནས།
སྤུ་ལྡེ་ཡག་པས་རྒྱལ་ས་ནོན་པར་གྱུར། བོན་ལ་སྔར་བཞིན་ཆེ་བ་གནང་ནས་སུ། རྒྱལ་གཤེན་བསྟན་པ་རབ་ཏུ་དར་བར་མཛད།
གསས་ཁང་ཆེན་པོ་བརྒྱ་དང་དྲུག་ཅུ་བཞེངས། བྲེ་སྣའི་བྲག་ལ་སྟོང་རྒྱུང་ཞབས་རྗེས་བཞག །ཅེས་དང༌།
རྒྱལ་རབས་གསལ་བའི་མེ་ལོང་ལས། སྤོ་བོའི་ཡུལ་ནས་སྲས་བྱ་ཁྲི་གདན་དྲངས་ཏེ། ཡར་ལུང་དུ་བཞུགས།
སྐུ་མཁར་བྱིང་ང་སྟག་རྩེ་བརྩིགས། ཡུམ་གྱིས་སྲས་བྱ་ཁྲི་ལ་འཇུས་ནས། ལྷ་ལ་དམོད་བོར་བས།
ནམ་མཁའ་ནས་སྒྲ་བྱུང་སྟེ། ཁྱེད་ཀྱི་བུ་དེ་ཀུན་ལས་རྒྱལ་བར་འགྱུར་རོ། །བུ་དེ་ཀུན་ལས་རྒྱལ་ཟེར་ཡང་སྤུ་དེ་གོང་རྒྱལ་དུ་གྲགས་སོ།
།རྒྱལ་པོ་འདིས་རྒྱལ་ས་བཟུང་སྟེ། བློན་པོ་ནི་རུ་ལས་སྐྱེས་ཀྱིས་བྱས་སོ། །རྒྱལ་བློན་འདི་གཉིས་ཀྱི་དུས་སུ།
གཡུང་དྲུང་གི་བོན་བྱུང་སྟེ། སྟོན་པ་གཤེན་རབ་མི་བོ་བྱ་བ་སྟག་གཟིག་འོལ་མོ་ལུང་རིང་དུ་སྐུ་འཁྲུངས།
ཁམས་ཆེན་པོ་བརྒྱད་ལས་སོགས་པ་བོན་པོའི་ཆོས་ཐམས་ཅད། ཞང་ཞུང་གི་ཡུལ་ནས་བསྒྱུར་ཏེ། དར་ཞིང་རྒྱས་པར་མཛད།
བོན་ལ་རིགས་དགུ་རུ་ཕྱེས་ཏེ། རྒྱུའི་བོན་ལ་རིགས་བཞི། འབྲས་བུའི་བོན་ལ་རིགས་ལྔའོ། །འབྲས་བུའི་བོན་རིགས་ལྔ་ནི།
གཡུང་དྲུང་ཐེག་པ་བླ་ན་མེད་པར་བཞུགས་པ་སྟེ། བདེ་འགྲོ་མཐོ་རིས་ཀྱི་ལུས་ཐོབ་པར་འདོད་དོ།
།ཞེས་གསུངས་པའི་དོན། བླ་མེད་ཐེག་པའི་བོན་ལ་སྤྱད་ན་བདེ་འགྲོ་མཐོ་རིས་ཀྱི་ལུས་ལས་མི་ཐོབ་པར་འདོད་གསུངས་པ་ཡིན་ན་ནི།
བླ་མེད་ཐེག་པའི་དོན་མ་རྟོགས་པས་ནོངས་སོ། །བདེ་འགྲོ་མཐོ་རིས་ཀྱི་ལུས་ཀྱང་ཐོབ་པར་འདོད་གསུངས་པ་ཡིན་ན་ནི།
འབྲས་དཀར་མོའི་ལོ་ལེགས་ན། ཕུབ་དང་སོག་མ་ཞོར་ལས་འབྱུང་བ་ཡིན་གསུངས་པ་དང་གཅིག་པས་འཐད་དོ།
།རྒྱུའི་བོན་པོ་ལ་རིགས་བཞི་ནི། འདིར་བོན་པོ་ཞེས་མི་རིགས་དཔེ་སྐྲུན་ཁང་གི་པར་མ། སྤྱི་ལོ་
༡༩༨༡ ལོར་པེ་ཅིང་དུ་པར་རྒྱབ་པར་གསལ་བ་འདིའི་རིགས་ལ། བདག་རྒྱུའི་ཡུལ་དང༌། བདག་པོ་ཡུལ་ཅན་གྱི་རྣམ་བཞག་མ་ཤེས་བཞིན་དུ་རྫུན་ཧམ་གྱིས་མིའི་ལད་མོ་བྱས་པས་གང་ལ་འགྲུབ།
ཡུལ་བོན་ལ་བཞི་ཡོད་ཅིང༌། ཡུལ་ཅན་བོན་པོ་གཅིག་གིས་བོན་བཞི་ཀར་སྤྱོད་རུང་བའི་ཕྱིར། རྒྱུའི་བོན་རིགས་བཞི་ནི།
སྣང་གཤེན་བལ་ཐོད་ཅན། འཕྲུལ་གཤེན་བལ་ཚོན་ཅན། ཕྱྭ་གཤེན་ཇུ་ཐིག་ཅན། འདུར་གཤེན་མཚོན་ཆ་ཅན་ནོ།
།དེ་ལ་སྣང་གཤེན་བལ་ཐོད་ཅན་གྱིས་ཕྱྭ་དང་གཡང་འགུགས། ལྷ་དང་སྨན་གསོལ། དགེ་ལེགས་དང་དཔལ་བསྐྱེད་ནས་མི་ནོར་རྒྱས་པར་བྱེད་དོ།
།འཕྲུལ་གཤེན་བལ་ཚོན་ཅན་གྱིས་མདོས་དང་ཡས་གཏོང༌། སྲིད་དང་རྟེན་འཛུགས། ཕྲལ་ཕུགས་ཀྱི་འགལ་རྐྱེན་ཐམས་ཅད་སེལ་བར་བྱེད་དོ།
།ཕྱྭ་གཤེན་ཇུ་ཐིག་ཅན་གྱིས་ལེགས་ཉེས་ཀྱི་ལམ་སྟོན། ཡིན་མིན་གྱི་ཐེ་ཚོམ་སེལ། ཟག་བཅས་ཀྱི་མངོན་ཤེས་འཆད་པར་བྱེད་དོ།
།འདུར་གཤེན་མཚོན་ཆ་ཅན་གྱིས་གསོན་གཤིན་གྱི་གེགས་བསལ། གཤིན་གྱི་དུར་འདེབས། ཆུང་གི་སྲི་མནན།
གནམ་གྱི་རྒྱུ་སྐར་བལྟ། སའི་འདྲེ་བརྡུང་བ་ཡིན་ནོ། །ཐམས་ཅད་རྔ་གཤང་གི་སྒྲ་འཁྲོལ་ཏེ། ཆབ་སྲིད་ནི་སྒྲུང་དང་ལྡེའུས་བསྒྱུར་རོ།
།
བོན་གྱི་ལོ་རྒྱུས་ལས། རྗེ་གཉའ་ཁྲི་བཙན་པོའི་དུས་སུ་བོན་དར།
རྒྱལ་པོ་གྲི་གུམ་བཙན་པོས་བོན་བསྣུབས། རྒྱལ་པོ་སྤུ་དེ་གུང་རྒྱལ་གྱི་དུས་སུ་བོན་དར། རྒྱལ་པོ་ཁྲི་སྲོང་ལྡེའུ་བཙན་གྱི་དུས་སུ་བོན་བསྣུབས།
རྟིང་དུ་བོན་པོའི་བླ་མ་གཉའ་ཆེན་ལི་ཤོ་ཀ་ར་བྱ་བས། ཁམས་ནས་བོན་གྱི་མཻ་རོ་བླངས་ནས། དབུས་གཙང་དུ་ཕེབས།
ཞེས་ཟེར་ཡང༌།ཁྲི་སྲོང་གི་རྗེས་སུ་བོན་པོའི་བླ་མ་མཚན་ལི་ཤོ་ཀ་ར་ཞུ་བ་ཁམས་ནས་དབུས་གཙང་དུ་ཕེབས་པ་སུ་ཡང་ཡོད་པ་མ་རེད།
བོན་ཆོས་ཐམས་ཅད་གཏེར་ནས་བཏོན། སྐྱིད་མཁར་རི་ཞིང༌། འཇེད་དར་ལྡིང༌། དགེ་ལྡིང་ཨན་ཙ་ཁ།
བཟང་རི། ཡོག་ཐང་ལས་སོགས་སུ་བོན་པོའི་སྡེ་བཙུག་བོན་རྒྱས་པར་བྱས་ཟེར། བོན་ལའང་བསྟན་པ་སྔ་དར་བར་དར་ཕྱིས་དར་གསུམ་བྱུང་འདུག
།ཞེས་གསུངས། ཡོངས་རྩེའི་འགྲེལ་བ་ལས། ཡུལ་ཡར་ལུང་ངང་པ་ཐང་དུ། སྲས་སྤུ་ལྡེ་གུང་རྒྱལ་གྱིས།
ཟ་འོག་གི་ཐོག་སྦྲ་ཆེན་པོ་ཕུབ། སློབ་དཔོན་སྟོང་རྒྱུང་ལས་སོགས་གཤེན་པོ་མང་པོ་གདན་དྲངས་ཏེ།
བོན་གྱི་བསྟན་པ་དར་བར་བྱ་བའི་ཕྱིར་དུ་བྱོན་ནས་དུར་ཡར་ལུང་དུ་བཏབ་སྟེ། རྒྱལ་དུར་ལ་སྔ་བ་དེ་ཡིན་ནོ།
།ཡབ་ཀྱིས་བོན་ལ་སྡང་ཡང༌། ངས་བོན་དར་དུ་བཅུག །བོན་ཁྲིམས་སྲིད་པའི་ཐོ་ཆེན་འཛུག་ཟེར་ཏེ།
དེ་ལེགས་བྱས་པས། ཐོ་ལེགས་བཙན་པོ་ཞེས་ཀྱང་བྱའོ། །ཞེས་གསུངས། རྒྱལ་རབས་གསལ་བའི་མེ་ལོང་ལས།
རྒྱལ་པོ་འདིའི་དུས་སུ་ཤིང་མེ་ལ་བསྲེགས་འཕྲོ་ལས་སོལ་བ། ཀོ་བ་བཞུས་པའི་སྙིང་པོ་ལས་སྤྲིན་བྱུང༌།
ལྕགས་རྡོ་ཟངས་རྡོ་དངུལ་རྡོ་གསུམ་རྙེད་ནས་སོལ་མེས་རྡོ་གསུམ་བཞུས་ནས། དངུལ་ཟངས་ལྕགས་གསུམ་བཏོན།
ཤིང་ལ་བུག་པ་ཕུག་ནས་གཤོལ་དང་གཉའ་ཤིང་བཅོས། མཐུན་གཉིས་གཉའ་རུ་བསྡེབས་ནས་ཐང་རྣམས་ཞིང་དུ་རྨོས།
ཆུ་བོ་ཡུར་དུ་དྲངས་ཏེ་ཞིང་ལ་ས་བོན་བཏབ། དེའི་གོང་དུ་ཞིང་ལས་སོ་ནམ་མེད། ཡབ་གྲི་གུམ་བཙན་པོ་དང༌།
སྲས་སྤུ་ལྡེ་གུང་རྒྱལ་གཉིས་ལ་སྟོད་ཀྱི་སྟེང་གཉིས་ཟེར། སྟེང་བང་སོ་གཡའ་དང་རྫ་ལ་བཏབ།
དེའི་ལས་དཔོན་རུ་ལས་སྐྱེས་ཀྱིས་བྱས་སོ་ཞེས་དང༌། གོང་གི་རྒྱལ་པོ་མུ་ཁྲི་བཙན་པོས་བོན་སྡེ་བསམ་གྱིས་མི་ཁྱབ་པ་བོད་དུ་སྤྱན་དྲངས་ཏེ་བོད་སྐད་དུ་བསྒྱུར།
ཁོང་གི་ཐུགས་དམ་ཉམས་ལེན་མཛད་པས་གསང་བདག་གྲུབ་པ་ཐོབ་པའི་རིག་འཛིན་དུ་གྱུར་ཏེ། ད་ལྟ་བོན་གྱི་མདོ་སྔགས་སེམས་གསུམ་ལ་ཁོང་གིས་ཐུགས་དམ་མཛད་ཅིང་བརྒྱུད་པ་མང་ངོ༌།
།
སྤུ་ལྡེ་བོན་གྱི་བསྟན་སྦྱིན་ཆེན་པོ་མཛད་དེ་ཁམས་བརྒྱད་ལས་སོགས་བོན་སྡེ་བསམ་གྱིས་མི་ཁྱབ་པ་ཞང་ཞུང་གི་ཡུལ་ནས་བསྒྱུར་རོ།
།སྔར་གཏེར་དུ་སྦས་ཟིན་པ་རྣམས་དུས་དང་སྐབས་སུ་མ་བབས་པས་ཉུང་ཤས་ལས་སླར་མ་ཐོན་པར་བཤད།
བོད་ཀྱི་ལོ་རྒྱུས་སྨྲ་བ་རྣམས་གསུང་རབ་ཁམས་བརྒྱད་སོགས་གཤེན་སྒུར་གྱི་ཆོས་ལ་བོན་དུ་བསྒྱུར་བ་རེད་ལབ་པ་ཚོ་ལེགས་པར་སེམས་རྣལ་དུ་འཇོག་ནས་སྤུ་ལྡེ་དང་ཆོས་བོད་དུ་བྱུང་བ་གཉིས་ཀྱི་སྔ་ཕྱི་ལ་ལེགས་པར་རྟོགས་ཤིག
།འོན་ཀྱང་ཀླུ་དགས་གཏེར་དུ་བཞེས་རྒྱུའི་ཁམས་ཆེན་གནམ་གྱི་ཁྲི་བདུན་རིང་ལ་མཁས་པ་མི་བཞིས་ཞང་སྐད་ལས་བོད་དུ་བསྒྱུར་བ་གྲི་གུམ་གྱི་དུས་སུ་སྦས་ཟིན་ནས།
སྤུ་ལྡེའི་དུས་སུ་སླར་ཁམས་ཆེན་བསྒྱུར་འདུག་པ་འདིའི་རྒྱུ་མཚན་ལ་བརྟེན་ནས་ཁམས་ཆེན་གྱི་ལུས་ཡོངས་རྫོགས་སྟོན་པའི་ཡིག་ཚོགས་ལ་རྒྱས་འབྲིང་བསྡུས་པ་བསྡུས་དོན་དང་བཅས་དགུ་ཙམ་དང་ཤེར་ཕྱིན་གྱི་དོན་ཙམ་སྟོན་པ་སོགས་མང་པོ་ཡོད་པ་འདི་རྣམས་བྱུང་ངམ་སྙམ།
གཞན་ཡང་ཐེག་པ་དགུའི་བོན་སྐོར་དུ་མ་བོད་སྐད་དུ་བསྒྱུར་བ་ཡང་ལུང་འདི་རྣམས་ཀྱིས་ཤེས་སོ།
།
རྒྱལ་བའི་བསྟན་ལ་བྱ་བ་ཆེར་བྱས་ཤིང༌།
།
མངའ་རིས་འབངས་ལ་ཕན་པའི་སྲོལ་བཟང་བཙུགས།
།
ཡ་རབས་གོང་མའི་མཛད་པ་བསྐྱངས་པའི་རྒྱུས།
།
སྤུ་ལྡེ་གུང་རྒྱལ་བསྟན་འཛིན་རྒྱལ་པོ་ཆེ།
།
ཚད་ལྡན་གཏམ་གྱིས་ཚད་ལྡན་བཤད་པའི་ངག །
ཚད་ལྡན་ཡིན་ཞེས་ཚད་འཛིན་མ་ཤེས་ན། །
ཚད་དུ་འཛིན་པའི་ཚད་མ་ག་ནས་རྙེད། །
ཚད་མིན་བཤད་མཛད་ཚོགས་རྣམས་སྐྱེངས་ཀྱང་ཅི། །
སྤུ་སྡེའི་སྲས་བརྒྱུད་ས་ལ་ལེགས་དྲུག་གི་སྐོར།
སྤུ་ལྡེ་དང་བུམ་ཐང་སྨན་མཚོའི་སྲས། ཨ་ཤོ་ལེགས། དེ་དང་དམུ་ལྕམ་ལ་ནའི་སྲས་དེ་ཤོ་ལེགས།
དེ་དང་ཀླུ་སྨན་མེར་མོའི་སྲས་ཐེ་ཤོ་ལེགས། དེ་དང་བཙན་མོ་གུར་སྨན་གྱི་སྲས་གུ་རུ་ལེགས།
དེ་དང་མཚོ་སྨན་འབྲོང་མོའི་སྲས། འབྲོང་བཞེར་ལེགས། དེ་དང་ས་སྨན་བུ་མོའི་སྲས་ཤོ་ལེགས།
དེ་ལྟར་ས་ལ་ལེགས་དྲུག་གི་རིང་ལ་ཞང་ཞུང་གི་མཁས་པ་ཉི་ཤུས་སྐུ་བསྲུང༌། བོན་ཡང་ཕ་རྒྱུད་ལུང་ཆེན།
ལྟ་བ་རྫོགས་ཆེན་བྱང་སེམས་ཐེག་ཆེན། གསས་མཁར་རྒྱུད་ཆེན། ཀུན་གསལ་བྱམས་ཆེན། འབུམ་ཁོག་དབང་ཆེན།
རྩེ་འདུས་ཁོག་ཆེན། སྡེ་ལྔ་མདོ་ཆེན། གསང་ཆེན་དབལ་ལུང༌། རྒྱས་ལྔ་འབུམ་ཆེན། སྡེ་བཞི་གཟུང་ཆེན་ནོ།
།རིག་པའི་གནས་ལྔ་རྣམས་དར་ཞིང༌། རིག་པའི་གནས་ལྔ་ནི། (སེམས་ཅན་ཐབས་ཀྱིས་འདུལ་བ་དང་།) ནད་ཀྱིས་གདུང་བ་སྨན་གྱིས་གསོ།
གདོན་གྱིས་གཙེས་པ་སྔགས་ཀྱིས་བཅོམ། རྒས་རྒུད་འཆི་འཕོ་རྩིས་ཀྱིས་བཏུལ། ཕས་ཀྱི་རྒོལ་བ་སྒྲས་ཚར་གཅོད།
ཅེས་སོ། །ཐེག་པ་རིམ་པ་དགུ་ལ་སྤྱད་ཅེས་བྱམས་མ་ནས་གསུངས་སོ། །གྲི་གུམ་གྱི་སྲས་རིང་ལ་དམུ་ཐག་ཆད་ནས་པུར་ས་ལ་ལུས་པས་ས་ལ་ལེགས་དྲུག་ཅེས་བྱའོ།
།ཞེས་དང༌། རྒྱལ་རབས་གསལ་བའི་མེ་ལོང་ལས། སྤུ་ལྡེ་གུང་རྒྱལ་གྱི་སྲས་ཨ་ཤོ་ལེགས། དེའི་སྲས་དེ་ཤོ་ལེགས།
དེའི་སྲས་ཐོ་ཤོ་ལེགས། དེའི་སྲས་གུ་རུ་ལེགས། དེའི་སྲས་འབྲོང་ཤེར་ལེགས། དེའི་སྲས་ཨི་ཤོ་ལེགས།
དེ་རྣམས་ལ་བར་གྱི་ལེགས་དྲུག་ཟེར། བང་སོ་གཡའ་སྤང་མཚམས་སུ་བཏབ། དེ་ཡང་སྤང་ལ་འཇའ་ཚོན་རྒྱས་པ་འདྲ།
ཞེས་དང༌།ཏུན་ཧུང་ཡིག་རྙིང་ལས་བོད་ཀྱི་རྒྱལ་པོའི་མཚན་འུ་དུམ་བཙན་གྱི་བར་ཇི་ལྟར་བྱུང་བ་རྣམས་གོང་དུ་ལྷན་ཅིག་ཏུ་བྲིས་པས་དེ་རྣམས་འདིར་ཡང་དྲན་པར་བྱ།
མཚན་ལ་བབས་འཛེགས་དང་མཐུན་མིན་ཅུང་ཙམ་རེ་བྱུང་བ་རྣམས་ཀྱང་མ་བཅོས་པར་བཤུས་ནས་བཞག་ཡོད།
ས་ལ་ལེགས་དྲུག་གི་རིང་ལ་བླ་ཡི་དཔོན་གསས་ནི། བསྒྲགས་པ་གླིང་གྲགས་ལས། དེ་ཤོ་ལེགས་བཙན་པོའི་བླ་མ་ནི།
ལི་ཤུ་སྟག་རིང༌། ལྷ་བོན་ཅོ་ཉག་ཞེར་ཐོད་དཀར། ཨི་ཤོ་ལེགས་ཀྱི་དཔོན་གསས། མུན་སྤངས།༼མུ་སྤངས།༽
ལྷ་བོན་ཅོ་སྟག་ཀླུ་གསས། འོད་རུ་ལེགས་ཀྱི་དཔོན་གསས་ནི། འབེ་ཤོ་ཀྲམ། ལྷ་བོན་བཅོ་ཕན་གྲགས།
འབྲོང་བཞེར་ལེགས་ཀྱི་དཔོན་གསས། གུ་རུབ་ཙན་དོ་མི་སེར། ལྷ་བོན་ཅོ་སྙན་རིང༌། དེ་ཤོ་ལེགས་ཀྱི་དཔོན་གསས།
ཕུ་ལུ་གྲུ་འཛིན། ལྷ་བོན་སེག་གཤེན་བདུད་འདུལ། ཞེས་གསུངས། དཔོན་གསས་ཞེས་པ་ནི་ཟབ་མོའི་གདམས་ངག་ཞུ་ཡུལ་གྱི་བླ་མ་དང༌།
ལྷ་བོན་ནི་སྲུང་མ་ལ་བསྐང་གསོལ་འཕྲིན་བཅོལ་བྱེད་པོ་ཡིན། ལྷ་བོན་ཞེས་པ་ནི་དུས་ད་ལྟའི་རིག་གནས་གསར་བརྗེའི་སྐབས་ཙམ་ལས་བོད་དབུས་གཙང་གི་ཡུལ་སྡེ་སྒེར་རྙིང༌།
རྫོང་གཞིས་སོགས་ལ་ཡོད་བཞིན་པ་ཡིན་ལགས། དེ་རྣམས་ཀྱང་གྲོང་སྔགས་པ་བོན་སྐྱོང་ལྷ་སྲུང་གི་སྐོང་བ་སྣ་རེ་ཙམ་ཀློག་ཤེས་པ་ཙམ་གྱིས་ཆོག་ཤེས་བྱེད་པ་འདུག
།སྔར་དུས་སུ་ལྷ་བོན་མཚན་ཉིད་ཚང་བ་ཡོད་ནས་རིམ་བཞིན་ཉམས་པའི་རྟགས་ཡིན་འདུག །དུས་ཕྱིས་ཀྱི་ལྷ་བོན་རྣམས་སྲུང་མའི་བསྐང་གསོལ་བཏང་རིང་ཙམ་ལས་དུས་རྒྱུན་མ་ཎི་བགྲང་བ་རེད།
དེ་ནི་བོན་ལ་ཡུལ་མིས་སྡང་བརྙས་བྱེད་ཆེ་ནས་ཁོང་ཚོས་བོན་ལ་ཡིད་མ་ཆེས་པ་དང་མ་དད་པ་ཡིན་པ་རེད།
དེ་རྗེས་ཆུ་ལ་ལྡེ་བརྒྱད་ནི། དར་རྒྱས་གསལ་སྒྲོན་ལས། ཤོ་ལེགས་དང་དམུ་ལྕམ་རྨང་ལེགས་ཀྱི་སྲས།
ཟ་ནམ་ཟིན་ལྡེ། ཞང་ཞུང་གཡུང་དྲུང་རྒྱལ་པོས་སྐུ་བསྲུང༌། ཟ་ནམ་ཟིན་ལྡེ་དང་མཚོ་སྨན་ཁྲི་དཀར་གྱི་སྲས།
ལྡེ་ནམ་འཕྲུལ་༼ནམ༽ གཞུང་བཙན། ཞང་ཞུང་མཚོ་མི་ཀུན་སྣང་གིས་སྐུ་བསྲུང༌། སེ་རྣོལ་གནམ་བདེ་དང་ཀླུ་ཐང་མེར་མོའི་སྲས་སེ་རྣོལ་ལྡེ།
ཞང་ཞུང་ཨ་སོ་གཙུག་ཕུད་ཀྱིས་སྐུ་བསྲུང༌། སེ་རྣོལ་ལྡེ་དང༌། འོ་ཟ་རི་མོ་མཚོའི་སྲས། ལྡེ་རྣོལ་ནམ་ཞང་ཞུང་ཨ་ལ་དན་ཅིས་སྐུ་བསྲུང་ལྡེ་ནོལ་ནམ་དང༌།
ཁྲི་སྨན་རྗེ་མའི་སྲས་ལྡེ་རྣོལ་པོ། ཞང་ཞུང་དར་མ་ཧ་རིས་སྐུ་བསྲུང༌། ལྡེ་རྣོལ་པོ་དང༌།
ས་བཙུན་སྙན་རྗེའི་སྲས། ལྡེ་རྒྱལ་པོ། ཞང་ཞུང་ད་ས་ཧ་རས་སྐུ་བསྲུང༌། ལྡེ་རྒྱལ་པོ་དང་སྨན་བཙུན་ལུང་གོང་གི་སྲས་ལྡེ་སྲིན་བཙན།
ཞང་ཞུང་མུ་ལ་མ་ཧོས་ཀྱིས་སྐུ་བསྲུང༌། དེ་དག་ནི་ཆུ་ལ་ལྡེ་བརྒྱད་དེ། བོན་འབུམ་སྡེའི་གཞུང་དར།
ལྷུན་གྲུབ་དབྱིངས་ཀྱི་གསས་མཁར་ལས་སོགས་པ་བཞེངས་སོ། །
རྒྱལ་རབས་གསལ་བའི་མེ་ལོང་ལས། ཨི་ཤོ་ལེགས་ཀྱི་སྲས། ཟོ་ནམ་ཟིན་ལྡེ།
༼དེའི་སྲས་རྒྱལ་ནམ་ལྡེ༽ དེའི་སྲས་ལྡེ་འཕྲུལ་ནམ་ཞུང་བཙན། དེའི་སྲས་སེ་ནོལ་ནམ་ལྡེ། ༼དེའི་སྲས་ལྡེ་རྣོལ་ནམ་རྒྱ་པར་འདུས།
དེའི་སྲས་ལྡེ་ནོལ་པོ། དེའི་སྲས་ལྡེ་རྒྱལ་པོ། དེའི་སྲས་ལྡེ་སྤྲིན་བཙན། འདི་རྣམས་ས་ཡི་ལྡེ་བརྒྱད་དོ།
།ལྡེ་བརྒྱད་བང་སོ་ཆུ་བོའི་གཞུང་ལ་བཏབ། དེའང་མཚོ་ལ་ཁ་བ་བབས་པ་འདྲ་ཞེས་གསུངས། ཞེས་ཆུ་ལ་ལྡེ་བརྒྱད་ཅེས་བང་སོ་ཆུ་བོའི་འགྲམ་སོགས་སུ་བརྩིགས་ནས་རྩི་དཀར་པོ་བྱུགས་པ་ཡིན་པར་མངོན།
ས་ཕྱོགས་ཀྱང་ཡར་ལུང་གི་ཕྱོགས་སུ་ངེས་སོ། །འདིར་ས་ཡི་ལྡེ་བརྒྱད་ཅེས་བྲིས་འདུག་པ་ནི་ནོར་བ་ཡིན་ནོ།
།
བསྒྲགས་པ་རིན་ཆེན་གླིང་གྲགས་ལས། ཟ་ནམ་ཟིན་གྱི་དཔོན་གསས་གྱིམ་ཐང་རྨའོ།
།ལྷ་བོན་སྟོང་ར་ཤིབ་ཤང༌། ནོ་འཕྲུལ་ནམ་གཞུང་བཙན། དཔོན་གསས་སུམ་པ་མུ་ཕྱྭ། ལྷ་བོན་གཤེན་ཐང་མི་ཆུང༌།
སེ་རྣོལ་གནམ་ལྡེ། དཔོན་གསས་དྲག་པོ་ཀུན་འདུལ། ལྷ་བོན་ཚེས་པ་གནམ་འདུལ། རྒྱལ་པོ་སྲིན་བཙན་གྱི་དཔོན་གསས་ནི་སྟག་སྒྲ་གེ་ཤག་ལྷ་བོན་ཡ་ཟི་ཁོད་གྲགས།
ཞེས་གསུངས། འདིའི་སྐོར་རྒྱལ་རབས་གོ་རིམ་བཞིན་མ་བྱུང་ཡང་དོན་དུ་རྒྱལ་པོ་རེ་ལ་གདམས་ངག་ཞུ་བའི་གནས་བླ་ཡི་དཔོན་གསས་རེ་དང་ལྷ་སྲུང་ལ་བསྐང་འཕྲིན་གསོལ་བའི་ལྷ་བོན་སོགས་གོང་བཞིན་ཡོད་པར་མངོན།
དར་རྒྱས་གསལ་སྒྲོན་ལས། ལྡེ་སྲིན་བཙན་དང་གཉན་བཙུན་མང་མོ་རྗེའི་སྲས། རྒྱལ་ཏོ་རོ་ལོ་བཙན།
ཞང་ཞུང་ཏ་ར་ལ་ཧ་རིས་སྐུ་བསྲུངས། འདི་ཡན་གྱི་རྒྱལ་པོ་དེ་རྣམས་ཀྱིས་ལྷ་དང་ཀླུ་ཡི་བུ་མོ་བཞེས།
འདི་མན་མི་དང་གཉེན་བསྲེས་པའོ། །
རྒྱལ་ཏོ་རོ་ལོང་བཙན་དང་འོ་མ་ལྡེ་ས་ཁྲི་བཙུན་མའི་སྲས་ཁྲི་བཙན་ནམ་དེ་དང་ས་ཁྲི་དཀར་གྱི་སྲས་ཁྲི་སྒྲ་དཔུང་བཙན།
དེས་དང་དམན་ཟ་ཀླུ་སྟེང་སྲས་ཁྲི་ཐོག་རྗེ་བཙན་རྒྱལ་དེ་གསུམ་གྱི་སྐུ་བསྲུང༌། ཞང་ཞུང་མུ་ཧ་ལ་རྒྱལ་གྱིས་མཛད་དོ།
།ཏོ་རོ་ལོ་བཙན་མན་གྱི་རྒྱལ་རབས་བཞི་ཡི་རིང་ལ། ཞང་ཞུང་གི་ཡུལ་བྱེ་མ་གཡུང་དྲུང་གི་ཚལ་དུ།
ལྷུན་གྲུབ་དབྱིངས་ཀྱི་ལྷ་ཁང་ལས་སོགས་བཞེངས་སོ། །རྒྱལ་རབས་གསལ་བའི་མེ་ལོང་ལས། རྒྱལ་པོ་ལྡེ་སྤྲིན་བཙན་གྱི་སྲས།
ཁྲི་བཙན་ནམ། དེའི་སྲས་ཁྲི་སྒྲ་དཔུང་བཙན། དེའི་སྲས་ཁྲི་དེ་ཐོག་བཙན། འདི་གསུམ་ལ་འོག་གི་བཙན་གསུམ་ཟེར།
བཙན་གསུམ་བང་སོ་གངས་དཀར་རྩེ་ལ་བཏབ། དེའང་གངས་ལ་ན་བུན་ཆགས་པ་འདྲ། ཞེས་དང༌། རྒྱལ་རབས་ཀྱི་མཚན་ལ་མི་མཐུན་པ་རྣམས་ནས་དར་རྒྱས་གསལ་སྒྲོན་འདི་ཁུངས་བཙུན་པར་འདུག་པས་དེ་གཙོ་ཆེའོ།
། མུ་འགོད། ཐ་ཚན་མུ་ཙུག་སྨར་རོ།།
No comments:
Post a Comment