Saturday, December 31, 2011

བྱ་དཀའི་ཀ་བཤད་གང་མཐོང་བྱུང་བརྗོད།



༄༅། །འཇིག་རྟེན་གྱི་ས་ཆེན་པོ་འདིར་གནས་པའི་གཞིས་བྱེས་བོད་མི་ཡོངས་དང་།གཡུང་དྲུང་སྤུན་གྲོགས་རྣམས་ལ་ ༢༠༡༢ ལོའི་གནམ་ལོ་གསར་པའི་ནང་
མཛད་འཕྲིན་ལྷུན་གྱིས་འགྲུབ་ཅིང་། རྒྱལ་གཤེན་བསྟན་པའི་
ཉི་འོད་མཁའ་ཁྱབ་བསྟན་འགྲོ་ཡོངས་ཀྱི་དཔལ་དུ་
འཛུམ་པའི་སྨོན་འདུན་གྲངས་མེད་ཞུ།

Thursday, December 29, 2011

རྗེས་དྲན་བྱིན་རླབས་འདོད་འཇོ།


དུས་ངན་སྙིགས་མའི་སྨག་རུམ་སྟུག་པོས་རྒྱལ་བསྟན་འོད་སྣང་སྒྲིབ་ཉེའི་མཚམས།།

སྔ་འགྱུར་བསྟན་པའི་གྲུབ༵་དབ༵ང་འབུམ་གྱི་རྗེས་བརྩེའི་རླབས་ཀྱིས་ཉེར་དྲངས་ཤིང༌།།

སྔོན་བསགས་འབྲས་བཟང་དུས་སུ་སྨིན་ཏེ་པ༵དྨ༵་འོད་ཀྱི་ཞིང་ཁམས་ནས།།

ཞི་བསིལ་བདེ་དགའི་དཔལ་ཡོན་སྟེར་བའི་རིན་ཆེན་ནོར༵་བུ༵འི་འོད་སྟོང་གྲོལ།།

Sunday, December 25, 2011

མི་ལོའི་ལྔ་བཅུའི་རིང་གི་ཚགས་ཤོག་དང་དུས་དེབ་ཀྱི་སྐོར།


མི་ལོ་ལྔ་བཅུའི་རིང་གི་བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་

བོད་ཡིག་གི་དུས་དེབ་དང་ཚགས་ཤོག་སྐོར།
(རྩོམ་ཡིག་འདི་ནི་ཕྱི་ལོ་ ༢༠༠༩ ལོར་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་ཆེན་སྐབས་བཤད་གཞིའི་ས་བོན་དུ་བྲིས་ཤིང་། མཐོ་སྒང་གི་ཉི་ཟེར་དུས་དེབ་སྤྱིའི་འདོན་ཐེངས་གསུམ་པའི་ཐོག་བཀོད།)

༄༅། །དེ་ཡང་ཕྱི་ལོ་ ༡༩༤༩ ལོ་ནས་བཟུང་རིམ་བཞིན་བོད་ཆོལ་ཁ་གསུམ་དུ་རྒྱ་ནག་དམར་པོའི་སྲིད་གཞུང་གིས་བཙན་གནོན་བྱ་འགོ་ཚུགས་ཤིང་བོད་ཀྱི་སྣོད་བཅུད་ཡོངས་རྫོགས་ལ་དབང་བསྒྱུར་གྱིས་ ༡༩༥༩ ལོར་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་དབུས་པའི་བོད་མི་འབུམ་ཕྲག་གཅིག་ལ་ཉེ་བ་ཞིག་ཐོག་མར་བོད་ཀྱི་ཁྱིམ་མཚེས་རྒྱ་གར་ནང་སྐྱབས་བཅོལ་དུ་ཕེབས་མ་ཐག་ནས་ཤེས་ཡོན་གྱི་བསྟི་གནས་སློབ་གྲྭ་ཁག་དང་དགོན་སྡེ་གྲྭ་ཚང༌། བཟོ་གཞིས་ཁག་སོགས་གསར་འཛུགས་ཀྱིས་གཞན་ཡུལ་དུ་རྐང་པ་ཐོག་མར་བཙུགས་སྐབས་ནས་བཟུང་གཞུང་འབྲེལ་དང་གཞུང་འབྲེལ་མ་ཡིན་པའི་རྣམ་པ་ཅི་རིགས་ཀྱི་ལམ་ནས་དེང་རབས་སྤྱི་ཚོགས་ཀྱི་དགོས་མཁོ་ལ་བསྟུན་པའི་བརྒྱུད་ལམ་ཚགས་ཤོག་དང༌། རྩོམ་རིག་སྒྱུ་རྩལ་གྱི་དུས་དེབ་རིགས་འདྲ་མིན་མང་པོ་ཞིག་རིམ་བཞིན་འགྲེམས་སྤེལ་གནང་འདུག་པ་ལས། ཁག་ཅིག་ད་ལྟའི་གནས་སྐབས་སུ་འདོན་མཚམས་བཞག་ཟིན་ཏེ་མི་ལོ་བཅུ་ཕྲག་ཁ་ཤས་འདས་ཟིན་ཡོད་འདུག་ལ། བཙན་བྱོལ་བོད་གཞུང་གི་བདུན་རེའི་ལས་རིམ་གསར་ཤོག་བོད་མིའི་རང་དབང་ལྟ་བུ་འདོན་སྤེལ་བྱས་ནས་མི་ལོ་ ༤༩ ཙམ་སོན་ཟིན་འདུག་ཅིང༌། ཁག་ཅིག་ད་ལྟའི་དུས་སྐབས་སུ་གསར་དུ་འདོན་སྤེལ་གནང་བཞིན་པ་སོགས་མདོར་ན་བཙན་བྱོལ་བོད་མིའི་སྤྱི་ཚོགས་ཁྲོད་བོད་ཡིག་གི་དུབ་དེབ་དང་ཚགས་ཤོག་གི་གྲངས་ཚད་མང་ཐག་ཆོད་ཅིག་བྱུང་འདུག་པས་ཚང་མའི་མིང་དང་ལོ་དུས་སོགས་ཤེས་རྟོགས་དཀའ་ནའང་རྒྱུན་དུ་ཚགས་ཤོག་དང་དུས་དེབ་སོགས་ལ་དོ་སྣང་དང་ཀློག་པ་པོ་ཞིག་ཡིན་པའི་ཆ་ནས་རང་ཉིད་ཀྱིས་ཤེས་རྟོགས་གང་ཡོད་དང༌། རྩོམ་སྒྲིག་པ་སོགས་འབྲེལ་ཡོད་ནས་མཁོ་སྤྲོད་བྱུང་བའི་དུས་དེབ་དང་ཚགས་པར་རྣམས་ཀྱི་མིང་དང་ལོ་དུས་སོགས་འགོད་པར་བྱ་བ་ལ།

Saturday, December 17, 2011

བྱམས་མ་སྔགས་བསྟོད་ཀྱི་སྡུད་འགྲེལ་བཞུགས།


༄༅། །ཀུན་སྐྱོབས་བྱམས་མ་སྔགས་བསྟོད་ཀྱི་ཚིག་དོན་མདོ་ཙམ་བསྟན་པའི་
སྡུད་འགྲེལ་ཐར་ལམ་ཐེམ་སྐས་ཞེས་བྱ་བའོ།
ཀུན་མཁྱེན་ཉི་མ་བསྟན་འཛིན།
ཟབ་ཟབ་བོན་སྐུའི་མཁའ་ལས་མ་གཡོས་ཀྱང༌། །
གསལ་གསལ་མཚན་དཔེའི་དཀྱིལ་འཁོར་མངོན་བསྟན་པས། །
མང་མང་སྐྱེ་རྒུའི་སྐྱབས་གཅིག་ལྷ་ཡི་ལྷ། །
ཡང་ཡང་རབ་བསྟོད་ཀུན་ལ་ཤིས་པར་སྩོལ། །

Thursday, December 15, 2011

གཡུང་དྲུང་བོན་གྱི་བསྟན་པའི་སྒོར་འཇུག་ཚུལ།


༄༅། །གཡུང་དྲུང་བོན་གྱི་བསྟན་པའི་སྒོར་འཇུག་པའི་གང་ཟག་གིས་བྱང་ཆུབ་བསྒྲུབ་པའི་ཚུལ་ལ། རྨད་བྱུང་བསླབ་པ་རྣམ་པ་གསུམ་གྱིས་རྒྱུད་བསྡམས་ཏེ། དཔྱོད་ལྡན་རིགས་ལམ་ལ་བརྟེན་ནས་མདོ་སྔགས་ཀྱི་གནད་བཙལ། དེ་རང་གི་རྒྱུད་ཐོག་ཏུ་བཀལ་ཏེ་བྱང་ཆུབ་བསྒྲུབ་པའི་ཚུལ་ནི། བཅུད་ལྡན་ཏེ་མཁས་བཙུན་བཟང་གསུམ་གྱི་ཡོན་ཏན་མཐའ་ཡས་པའི་གང་བའི་དགེ་བའི་བཤེས་གཉེན་དང༌། ཁྱད་པར་དུ་གཞུང་གང་བཤད་པ་སྐབས་སུ་བབ་པ་དེའི་གནད་དོན་ལ་དོགས་པ་ཆོད་པ་ཞིག་བཙལ། དེ་ལ་བསྟེན་ཏེ། ༡༽དོན་ལྔ་དང་༢༽ཚུལ་གསུམ་གྱི་སྒོ་ནས་རྗེས་སུ་དཔག་པའི་བློ་བཙལ། བློ་དེ་ཡང་མདོ་སྔགས་སེམས་གསུམ་གྱི་གདམས་པ་ལ་འཇུག་ཅིང་མཐའ་ཆོད་པའི་རྙེད་དོན་རང་རྒྱུད་ལ་སྦྱར་ཏེ་བྱང་ཆུབ་བསྒྲུབ་པའི་ཚུལ་གཅིག་ཡོད་ལ།

Tuesday, December 13, 2011

རྟོགས་བརྗོད་དད་སྤྲོའི་འཛུམ་གྲོལ།


ཡེ་སྟོང་སྤྲོས་བྲལ་རང་ཤར་གདོད་མའི་མཁར། །
        མ་འགག་ལྷུན་རྫོགས་རང་གྲོལ་ཉི་གཞོན་འཛུམ། །
        སྟོང་གསལ་དབྱེ་བྲལ་རང་རྩལ་འོད་སྟོང་འབར། །       
        རྒྱལ་ཀུན་འདུས་གཙོ་དཔོན་གསས་བླ་མར་འདུད། །

        གང་ཁྱོད་མཚན་དཔེའི་དཀྱིལ་འཁོར་མངོན་བཞད་ནས། །
        བགྲང་བྱ་བརྒྱད་ཅུར་ཕེབས་པའི་དགྱེས་སྟོན་དུ། །
        གསང་གསུམ་མཛད་འཕྲིན་བསྟར་ཕྲེང་ཚར་དངར་བའི། །
        རྟོགས་བརྗོད་དད་སྤྲོའི་འཛུམ་མདངས་འདི་ན་གྲོལ། །

མཁྱེན་གསོལ་རྒྱལ་གཤེན་དགྱེས་པའི་མཆོད་སྤྲིན།


བཀའ་དྲིན་རྗེས་དྲན་གྱི་མཁྱེན་གསོལ་རྒྱལ་གཤེན་དགྱེས་པའི་མཆོད་སྤྲིན།


སྤྱི་གཙུག་བདེ་ཆེན་ཉི་ཟླའི་གུར་ཁྱིམ་གྱི་ཀློང་ནས། །
བཀའ་དྲིན་མཚུངས་ཟླ་བྲལ་བའི་དཔོན་གསས་ཀྱི་བླ་མ། །
སྙིགས་དུས་རྒྱལ་གཤེན་བསྟན་པའི་མགོན་སྐྱབས་དང་དཔུང་གཉེན། །
མཉམ་མེད་རྒྱལ་བ་གཉིས་པའི་གདུང་འཚོབ་ཁྱེད་མཁྱེན་ནོ། །

Friday, November 4, 2011

སྟོན་པའི་དུས་ཆེན་ངོས་འཛིན།

༸སྐྱབས་རྗེ་ཡོངས་འཛིན་སྨྲ་བའི་དབང་པོ་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག
༄༅། །ཧོར་ཟླ་བཅུ་གཉིས་ཚེས་བཅོ་ལྔ་ཉིན་གྱི་དུས་བཟང་འདི་ནི་འགྲོ་བ་ཡོངས་ཀྱིས་མ་འདྲིས་པའི་མཛའ་བཤེས་དམ་པ། བདག་ཅག་གི་སྟོན་པ་བཀའ་དྲིན་ཅན་༸རྒྱལ་བ་གཤེན་རབ་མི་བོ་མཆོག་ཡབ་རྒྱལ་བོན་ཐོད་དཀར་དང། ཡུམ་ཡོ་ཕྱི་རྒྱལ་བཞད་མ་གཉིས་ཀྱི་སྲས་སུ་འཛམ་བུའི་གླིང་དུ་སྐུ་འཁྲུངས་པའི་དུས་ཚིགས་ཁྱད་པར་ཅན་ཡིན་ལ།

Monday, September 19, 2011

གཡུང་དྲུང་བོན་གྱི་སྐྱབས་འགྲོའི་སྐོར་སྙིང་བསྡུས།

༄༅། །གཡུང་དྲུང་བོན་གྱི་བསྟན་པའི་འཇུག་སྒོ་དང་པོ་སྐྱབས་འགྲོ་དང་སེམས་བསྐྱེད་ཡིན་ཏེ། མཛད་མདོ་འབྲིང་པོ་ལས། སེམས་བསྐྱེད་སྐྱབས་འགྲོ་འབྲེལ་བ་བོན་གྱི་གཞི་མ་ཡིན། ཞེས་དང༌། དྲང་དོན་ལས། སྐྱབས་འགྲོའི་དོན་མཐོང་བྱང་ཆུབ་སེམས་ཀྱང་སྐྱེ། ཞེས་གསུངས་པ་ལྟར་རོ། །དེས་ན་འཁོར་བ་སྡུག་བསྔལ་གྱི་རྒྱ་མཚོར་བྱིངས་པའི་འགྲོ་བ་ཀུན་ཐར་པ་བྱང་ཆུབ་ཀྱི་གོ་འཕང་རིན་པོ་ཆེ་ཐོབ་པའི་ལམ་གྱི་གཞི་རྩ་སྐྱབས་འགྲོའི་ཉམས་ལེན་ལ་འཇུག་ཚུལ་ནི། ཐོག་མར་རང་ངམ་གཞན་གྱི་འཁོར་བའི་སྡུག་བསྔལ་གྱི་འཇིག་པ་ལ་སྐྲག་པའི་ངེས་འབྱུང་དང༌། དེ་ལས་བསྐྱབ་འདོད་ཀྱི་སྙིང་རྗེ། སྐྱབས་གནས་ལ་ཡིད་ཆེས་པའི་དད་པ་གསུམ་གྱིས་ཀུན་ནས་བསླང་སྟེ། མདུན་གྱི་ནམ་མཁར་ཉི་ཟླ་པད་མའི་གདན་ལ་རྩ་བའི་བླ་མ་དུས་གསུམ་སངས་རྒྱས་ཀྱི་ངོ་བོ་ཉིད་དུ་བསྒོམ། དེ་ཡང་སྐུ་སྣང་ལ་རང་བཞིན་མེད་པ་ཞི་རྒྱན་བཅུ་གསུམ་གྱིས་བརྒྱན་པ། དེའི་དབུ་ཐོག་ནས་ཡར་ལ་བརྒྱུད་པའི་བླ་མ་རྣམས་ཀུན་ཏུ་བཟང་པོ་ལ་ཐུག་གི་བར་དུ་མཐོ་བརྩེགས་སུ་བཞུགས་པ། དེ་ལ་ཕྱོགས་བཅུའི་དུས་གསུམ་གྱི་བདེ་བར་གཤེགས་པ་རྒྱལ་བ་སྲས་དང་བཅས་པ་བླ་མ་ཡི་དམ་མཁའ་འགྲོའི་ལྷ་ཚོགས་དམ་ཅན་སྲུང་མ་དང་བཅས་པ་སྤྲིན་བཏིབས་པ་ལྟར་བཞུགས་པ། 

Saturday, August 27, 2011

མ་ཏྲིའི་བསྐུལ་མ་ཚིགས་སུ་བཅད་པ་བཞུགས།

སྤྲུལ་སྐུ་བློ་ལྡན་སྙིང་པོ།

༄༅། །ཨཱོྃ་མ་ཏྲི་མུ་ཡེ་ས་ལེ་འདུ། ཨེ་མ་ཧོ། སྤྱི་གཙུག་བདེ་བའི་ཕོ་བྲང་ན། །བསྟན་པའི་མངའ་བདག་རིན་པོ་ཆེ། །འདུལ་གཤེན་དྲུག་དང་ཁྱེའུ་བཞི། །སྒྲིབ་མེད་འོད་ཀྱི་སྐུ་རུ་བཞུགས། །མོས་པའི་ཡིད་ཀྱིས་གསོལ་བ་འདེབས། །བྱིན་རླབས་ཞུ་འདོད་སྐྱེས་བུ་རྣམས། །མ་ཏྲི་མུ་ཡེའི་གསུང་དབྱངས་སྒྲོགས། །ཨཱོྃ་མ་ཏྲི་མུ་ཡེ་ས་ལེ་འདུ། ཀྱེ་མ་གསོན་དང་སྐལ་ལྡན་རྣམས། །གནས་འདིར་ཚོགས་པའི་ལྷ་མི་རྣམས། །འོ་སྐོལ་མ་རིག་འཁྲུལ་པ་ཡིས། །འབྱུང་རིག་རང་དབང་མ་ཐོབ་ནས། །རིགས་དྲུག་འཁོར་བའི་གནས་སུ་འཁྱམས། །སྒྱུ་མ་ཤ་ཡི་གདོས་པ་བླངས། །སྡུག་བསྔལ་སྣ་ཚོགས་ཉམས་སུ་མྱོང། །གཏན་དུ་ཐར་མེད་སྙིང་རེ་རྗེ། །སྡུག་བསྔལ་དེ་ལས་ཐར་ནས་སུ། །ཐར་པའི་ལམ་ལ་བསྒྲོད་པ་དང། །བདེ་གནས་ཐོབ་འདོད་སྐྱེས་བུ་རྣམས། །མ་ཏྲི་མུ་ཡེའི་གསུང་དབྱངས་སྒྲོགས། །

Thursday, August 4, 2011

རྫོགས་ཆེན་དང་དབུ་མ་པའི་ལྟ་བའི་འབྲེལ་བ།

མགོན་པོ་ཀླུ་སྒྲུབ་དང་བོད་ཀྱི་ཆོས་བརྒྱུད་ཁག་གི་ལྟ་བའི་འབྲེལ་བའི་ཐོག་རྒྱལ་ཡོངས་ཚོགས་འདུ་ཞེས་པའི་
བགྲོ་གླེང་ཞིག་གི་ཆེད་རྩོམ།
བྱུང་རིམ་སྙིང་བསྡུས།
༄༅། །དེ་ཡང་བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་དེ་ཉིད་ཀྱིས་འགྲོ་བློའི་མོས་ཁམས་དང་བསྟུན་ཏེ་བོན་སྒོ་བརྒྱད་ཁྲི་བཞི་སྟོང་དང༌། ཐེག་པ་རིམ་དགུ། སྒོ་བཞི་མཛོད་ལྔ༌། ཕྱི་ནང་གསང་གསུམ་སོགས་གདུལ་བྱ་སེམས་ཅན་རྣམས་ཐར་པ་དང་ཐམས་ཅད་མཁྱེན་པའི་གོ་འཕང་རིན་པོ་ཆེར་བཀྲི་ཐབས་ཀྱི་གཞུང་དོན་ཡོངས་སུ་ཚང་ལ་མ་ནོར་བར་གཏན་ལ་ཕབ་པ་དེ་ཉིད་རྗེས་འཇུག་སློབ་མ་རྣམས་ཀྱིས་འཆད་རྩོད་རྩོམ་སྒྲུབ་བཞིའི་སྒོ་ནས་ཉམས་ལེན་དང་དཔྱད་ཞིབ་མཐིལ་ཕྱིན་གནང་ནས། 

Tuesday, May 17, 2011

བསང་གསོལ་དང་རླུང་རྟའི་སྐོར།

ཀི་ཀི་བསྭོ་བསྭོ་ལྷ་རྒྱལ་ལོ།།

དང་པོ་བསང་གསོལ་གྱི་བྱུང་རིམ་ནི། བདག་ཅག་གི་སྟོན་པ་ཐུགས་རྗེ་ཅན་དེ་ཉིད་ཀྱིས་ཐེག་པ་གཉིས་པ་སྣང་གཤེན་གྱི་བོན་སྒོའི་སྐབས། རྩི་ཤིང་དང༌། ཞུགས་ཤང༌། གསེར་སྐྱེམས། ནམ་རྒྱང༌། ཤིང་རིས། བལ་ཚོན་སྣ་ལྔ༌། གསེར་གཡུ། དར་ཟབ་སོགས་ཕུན་སུམ་ཚོགས་པའི་ཡོ་བྱད་བསགས་ཏེ་ལྷ་བསང་དང༌། མནོལ་གསང༌། གྲིབ་བསང༌། བཙོག་བསང་བཅས་བསང་གི་རྣམ་གྲངས་དུ་མ་ཞིག་གཏན་ལ་ཕབ་པ་ནས་བསང་གསོལ་ལྷ་མཆོད་ཀྱི་ཤེས་རིག་འདི་ཉིད་དབུ་བརྩམས་ཤིང༌།

Monday, May 16, 2011

དམ་ཚིག་ས་མ་ཡ་འབུམ་སྡེའི་གྱེས་གཞི་དམ་ཚིག་བརྒྱ་དང་རྩ་བརྒྱད།

གསང་བ་སྔགས་ཀྱི་དམ་ཚིག་ས་མ་ཡ་འབུམ་སྡེའི་གྱེས་གཞི་
དམ་ཚིག་བརྒྱ་དང་རྩ་བརྒྱད་ནི།
༡༽རྩ་བ་ལྔ། ༢༽ཡན་ལག་ཉི་ཤུ། ༣༽སྤྱི་དམ་སུམ་ཅུ། ༤༽སྦོམ་པོ་བཅུ་དྲུག ༥༽ཉེས་བྱས་དགུ། ༦༽ཆེ་བ་བཞི། ༧༽རྣལ་འབྱོར་དྲུག ༨༽གཞི་ལམ་འབྲས་བུའི་སྐྱོན་དགུ། ༩༽ལྟུང་བ་བདུན། ༡༠༽དབང་མ་ཞུས་པ་དང། ༡༡༽གདར་ཤ་མ་ཆོད་པ་བཅས་སོ།།
༡༽ རྩ་བ་ལྔ།
༡༽ ༡, དཔོན་གསས་བླ་མ་ལ་སྲུང་བའི་རྩ་བ།
༡༽ ༢, ཡི་དམ་ལྷ་ལ་སྲུང་བའི་རྩ་བ།
༡༽ ༣, བདེར་གཤེགས་བཀའ་ལ་སྲུང་བའི་རྩ་བ།
༡༽ ༤, གཡུང་དྲུང་སྤུན་ལ་སྲུང་བའི་རྩ་བ།
༡༽ ༥, བྱང་ཆུབ་སེམས་ལ་སྲུང་བའི་རྩ་བ་བཅས་སོ།།
རྩ་བའི་དམ་ཚིག་རྣམས་ནི་ཤིང་གི་རྩ་བ་དང་འདྲ་ཞེས་གསུངས།

Saturday, May 14, 2011

གསང་བ་སྔགས་ཀྱི་འཇུག་སྒོའི་སྤྱོད་ཚུལ།

༈ གསང་བ་སྔགས་ཀྱི་འཇུག་སྒོའི་སྤྱོད་ཚུལ་ལ།
བསྙེན་པའི་གཞི་མ་སྒོ་དགུ་དང།
སྒྲུབ་པའི་ཡན་ལག་བཅོ་བརྒྱད།
ལས་ཀྱི་མཐའ་བསྒྱུར་མཆོང་ཆེན་སྡེ་དགུའོ།།

Thursday, May 12, 2011

དཔོན་གསས་བླ་མའི་མཛད་རྣམ་སྙིང་བསྡུས།

དཔོན་གསས་བླ་མའི་མཛད་རྣམ་ཟུར་ཙམ་གླེང་བ་ཀུ་ཤའི་ཟེགས་མ།
༄༅། །བདག་ཅག་གི་རྩ་བའི་བླ་མ་༸དཔལ་གཤེན་བསྟན་སྨན་རིའི་གླིང་གི་དགེ་བའི་བཤེས་གཉེན་ཆེན་མོ་ལུང་དཀར་དཔོན་སློབ་དྲང་སྲོང་ཚུལ་ཁྲིམས་རྣམ་དག་(དྲང་སྲོང་གཡུང་དྲུང་)རིན་པོའི་(༡༩༣༡།༡༩༩༨)མཛད་རྣམ་ཚིགས་སུ་བཅད་པ་འདི་ཉིད་ ༢༠༠༠ ཟླ་ ༧ ཚེས་ ༦ ཉིན་རྩོམ་རྒྱུགས་སྐབས་སུ་བྲིས་པ་ཞིག་ཡིན།
དཔག་མེད་ཚོགས་བསྐྱེད་ལས་བསྐྲུན་པའི།། མཚན་བཟང་ཉི་གཞོན་བྱེ་བའི་དཔལ།། ཐབས་ཤེས་སྐྱ་རེངས་གསར་པ་ཡིས།། མདོ་ཁམས་འཛིན་མའི་ཕང་བར་དྲངས།། ༸ སྨྲ་བརྗོད་འགྲོ་འདུག་བྱ་རྩོལ་གྱིས།། དབང་དུ་མ་གྱུར་བྱིས་དུས་ཤིག །ཞིང་འདིའི་ལམ་སྟོན་སྐྱེད་བྱེད་ཉིད།། འཕྲད་མེད་ཕ་རོལ་གནས་སུ་བཞུད།།

Wednesday, May 11, 2011

གཡུང་དྲུང་བོན་གྱི་འཆད་ཉན་ལམ་སྲོལ།

དང་པོ། སྤྱི་བཤད།
༄༅། །རྣམ་འདྲེན་ཡང་དག་པར་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་མཆོག་གི་བསྟན་པ་གཡུང་དྲུང་གི་བོན་ཞེས་པ་ནི། སྤྱད་ཅིང་ཉམས་སུ་བླངས་པ་ལ་བརྟེན་ནས་ལུས་ཅན་གྱི་སྡུག་བསྔལ་ལས་སྐྱོབ་པར་བྱེད་པའི་ཐབས་སུ་གྱུར་པའི་རྣམ་དཀར་གྱི་ཡོན་ཏན་ཞིག་ཡིན།

Tuesday, April 19, 2011

ལྷོ་གཏེར་ཐེག་དགུའི་མདོར་དོན།

ནད་གདུང་བཟང་ངན་པྲ་ལྟས་མོ་ཡིས་བརྟག་ནས། ལེགས་ཉེས་བླང་དོར་རྣོ་མཐོང་རྩིས་ཀྱིས་གཞལ་ཏེ། སྣང་ཡུལ་བདེ་སྡུག་ནད་གསོ་གཏོ་ཡིས་སེལ་ཞིང༌། དུས་མིན་འབྱུང་འཁྲུག་འཆི་བསླུ་དཔྱད་ཀྱིས་གསོ་བར་བྱེད་པའི་ཕྱྭ་གཤེན་ཐེག་པ།
གྱེར་སྒོ་བཞི་དང་སྐད་གཅོང་དགུ་ཡི་སྒོ་ནས་སྨེ་མནོལ་མི་གཙང་འབག་གྲིབ་བསལ་ཞིང་འདྲེ་དགུ་སྲི་བཅུ་ཐབས་ཀྱིས་འདུལ་བ་དང༌། ཀླུ་གཉན་ས་བདག་གི་འགྲམ་འཁྲུག་བསྡུམ་ཞིང་མཁའ་ཀློང་དབྱིངས་གསུམ་གྱི་མ་ཚོགས་རྣམས་མཆོད་མདོས་བསྐང་རྫས་ཀྱིས་མཉེས་ནས་བསྟན་འགྲོའི་བདེ་སྐྱིད་ཀྱི་ལེགས་ཚོགས་འཕེལ་ཏེ་མི་མཐུན་སྙིགས་མའི་གུད་པ་ཞི་བར་བྱེད་པའི་སྣང་གཤེན་ཐེག་པ།

བོན་ཐེག་པ་རིམ་དགུའི་ལྟ་བའི་ཁྱད་པར་འགའ་ཞིག་གི་སྐོར།

མདོ་སྔགས་གཞུང་དོན་སྙིང་ཐིག་ལྟ་བའི་ཁྱད། །
ཤིན་ཏུ་ཆ་ཕྲ་རབ་ཏུ་གཏིང་ཟབ་ཕྱིར། །
སོ་སོའི་ཁྱད་འབྱེད་སྨྲ་ལྕེ་ཐུང་ན་ཡང༌། །
གསུང་བསྐུལ་མི་ལྡོག་ཙམ་ཞིག་འདི་ན་འགོད། །

Sunday, April 10, 2011

བཀྲ་ཤིས་པའི་རྟགས་བརྒྱད་ཇི་ལྟར་བྱུང་ཚུལ་བཤད་པ།

༄༅། །དེ་ཡང་རྟགས་བརྒྱད་ནི་བོད་མི་རིགས་ཀྱིས་ཁ་དགེ་བཀྲ་ཤིས་ཡོང་བའི་མཚོན་རྟགས་གཙིགས་ཆེ་ཤོས་ཤིག་འཛིན་གྱི་ཡོད་པ་ནི། ཆོས་ལུགས་ཀྱི་ལྟ་བ་ཡོད་མེད་ལ་མ་ལྟོས་པར་བོད་ཀྱི་སྲོལ་རྒྱུན་རིག་གནས་ལ་དགའ་ཞེན་ཡོད་རིགས་ཚང་མ་གཅིག་གྱུར་ཡིན། བཀྲ་ཤིས་པའི་རྟགས་བརྒྱད་འདི་ཆེ་ས་དགོན་གྱི་གཙུག་ལག་ཁང་དང་ལྷ་ཁང་ཆེ་ཆུང་རིགས་ཀུན་དང་བླ་བྲང་གྲྭ་ཤག་མགྲོན་ཁང་བཅས་དང་། རྒྱལ་པོའི་ཕོ་བྲང་། སྤྱིར་བཏང་གྲོང་པའི་སྡོད་ཁང་། ཁྲིམས་སྲིད་སྡེ་ཚན་གྱི་ཚོགས་ཁང་། སྤྲོ་སྐྱིད་ཁང་། གཞན་རས་གུར་བཅས་ཚང་མའི་ཕྱི་ནང་གང་སར་རི་མོའི་ལམ་དང་། རྒྱུ་ཆ་སྣ་ཚོགས་ཀྱིས་གྲུབ་པའི་དབྱིབས་གཟུགས་ལས་གྲུབ་པ་བཤམས་སྒྲིག་བྱེད་ཀྱིན་ཡོད།